دوو جۆری نوێی پەپوولە لە هەرێمی کوردستان تۆمار دەکرێن

ئاڤا نیوز

 

دوو جۆری نوێی پەپوولە لە کوێستانەکانی هەرێمی کوردستان تۆمار دەکرێن و لە زانکۆیەکی ڕووسیا توێژینەوەیان لەسەر دەکرێت.

 

وێنە گەورەکە: دوو جۆری نوێی پەپوولە لەسەر ئاستی کوردستان و عێراق، لە کوێستانەکانی هەڵگورد دۆزرانەوە و لە گۆڤارێکی زانستی جیهانی تۆمار کران، هاوکات دۆزینەوەکە لەلایەن دوو توێژەری زانکۆی سلێمانییەوە بووە بە هەماهەنگی لەگەڵ توێژەرێکی ڕووسی بەناوی ئاناتۆلی کروپیتسکی، لە زانکۆی لۆمۆنۆسۆڤ لە مۆسکۆ.

 

لێدوانی فەرمی: سۆما ئیسماعیل مەجید، توێژەری بواری زیندەوەرزانی لە زانکۆی سلێمانی بە ئاڤا نیوزی ڕاگەیاند: پەپوولەکان پیتێنەری گرنگن و پاڵپشتی زۆربوونی  ڕووەکەکان و جۆراوجۆرییان دەکەن، هاوکات بەشێکن لە زنجیرەی خۆراکی و نیشاندەری تەندروستیی سیستەمی ژیگەیین، بوونی ئەو پەپوولانە یارمەتیدەرە بۆ پاراستنی هاوسەنگی سیستەمی ژینگەیی.

 

ئەمەش بزانە: توێژەرەکەی بواری زیندەوەرزانی ئاماژەی بەوەکرد، کە ئەم جۆرە پەپوولەیە تایبەتن بە ناوچە کوێستانییە بەرزەکان، لەسەر ئەو ڕووەکانە دەژین کە لەو ناوچە ساردانە بوونیان هەیە، هاوکات گرنگی پەپوولەکان بۆ مانەوەی جواروجۆری گوڵەکانە، ئەگەر ئەوان نەبن پیتاندنیش نامێنێت و سیستمی ژینگەیی لەو ناوچانە تێکدەچێت.

 

ئەوەی پێویستە بیزانیت: دوو جۆرەکەی ئەم پەپوولەیە بەسەر چەندین وڵات و ناوچەی جیاواز دابەشبوون، کە بەم شێوەیەیە: 

 

پەپوولەی جۆری یەکەم، بەناوی Callophyrus paulae تۆمار کراوە، خۆراکی لەسەر شیلەی گوڵی Onobrychis cornuta لە کوێستانەکان، پێشتر پەپوولەکە لە وڵاتانی تورکیا، ئەرمینیا، جۆرجیا، ئازەربایجان، ئێران، تورکمانستان، ئەفغانستان تۆمار کراوە.

 

پەپوولەی جۆری دووەم، بەناوی Turanana cytis kurdistana تۆمار کراوە و بەناوی کوردستانەوەیە، ئەم جۆرەیان تایبەتە بە کوێستانەکانی زاگرۆس، هاوکات پارێزگای وان و ناوچەی هەکاری لە باکووری کوردستان، لە ئێستاشدا لە چیای هەڵگورد تۆمار کراوە.

 

گۆشەیەکی دیکە: ئاشکراکردنی ئەو دوو جۆرە پەپوولە نوێیە لەلایەن توێژەرانی زانکۆی سلێمانی، سۆما ئیسماعیل مەجید و سۆران حمەعەلی ئەحمەد بووە، بە هاوکاریی و هەماهەنگی دکتۆر ئەناتۆلی کروپیتسکی، کە پسپۆڕە لە ناسینی خێزانی ئەو جۆرە پەپوولەیە، هاوکات مامۆستای زانکۆی لۆمۆنۆسۆڤ-ـە لە مۆسکۆ.