لە باكووری كوردستان خۆپیشاندان لەدژی دانانی قەیوم بەردەوامە

ئاڤا نیوز

 

خۆپیشاندانی جەماوەری لە چەند شارێكی باكووری كوردستان لەدژی دانانی قەیوم لەشوێنی بەرپرسە هەڵبژێردراوەكانی كورد بەردەوامە، هێزە ئەمنییەكانی توركیاش دەستیان بە ڕەشبگیری كردووە و تائێستا 200 هاووڵاتی دەستگیركراون، كە 173 لەوانە منداڵن.

 

وێنە گەورەكە: ماوەی چەندین ڕۆژە لە دژی دانانی قەیوم لە جێگەی بەرپرسە هەڵبژێردراوە کوردەکان خۆپێشاندان و ناڕەزایەتیی لە باکووری کوردستان بەردەوامی هەیە، لە چەند شارێکیش ڕووبەڕووبوونەوە لە نێوان هاووڵاتییان و هێزە ئەمنییەکانی لێ کەوتووەتەوە. 

 

لێدوانی فەرمی: دێڤریم دەمیر، هاوسەرۆکی شارەوانی ماردین، بە میدیاكانی باكووری كوردستانی ڕاگەیاندووە، وێڕای شەرمەزاركردنی ئەو هەوڵە ناڕەوایە بۆ دانانی قەیوم لەجێگەی بەرپرسانی هەڵبژێردراوی شەرعی ، ئەو كارەی حكومەتی توركیا خیانەتە بۆ مۆدێلی حكومڕانی شارەوانییەكان، كە زۆر ماندووبووین بە بونیاتنانی.

 

زانیاریی زیاتر: بەهۆی بەردەوامبوونی ناڕەزایەتییەکان پۆلیسی توركیا هەڵمەتی هەڵكووتانە سەر ماڵان و ڕەشبگیری دەستپێكردووە، زۆربەی دەستگیركراوەكانیش منداڵ و مێرمنداڵن.

 

ئەوەش بزانە: ئەحمەد تورک، سیاسەتمەداری دێرینی کورد و هاوسەرۆکی شارەوانی ماردین کە ئێستا لە پۆستەکەی دوورخراوەتەوە، لەنێو ئاپۆڕای جەماوەریی لایەنگرانی "دەم پارتی" قسەی كرد و وتی:"دەسەڵاتدارانی حكومەتی توركیا دەستێك بۆ ئاشتی درێژدەكەن و بە دەستەكەی تریش دارێك هەڵدەگرن و هەوڵدەدەن دەستبەرداری ئازادی و مافەكانمان بین".

 

 مەترسی بابەتەكە: لایەنە ئۆپۆزسیۆنەكانی توركیا، ترسیان لەوەیە ئەو سیستەمە سەركوتكارییەی كەوا كابینەی ئێستای حكومەتی توركیا پەیڕەوی دەكات، ببێتە سیستەمێكی سەرتاسەری و هەمیشەیی و، ناوچەكانی دیكەی توركیاش بگرێتەوە.