سەرۆکوەزیرانی عێراق بەرەو سعودیە بەڕێکەوت

ئاڤا نیوز

 

بە مەبەستی بەشداریکردن لە لوتکەی نائاسایی عەرەبی ئیسلامی کە بڕیارە لە ڕیازی پایتەختی سعودیە بەڕێوەبچێت، سەرۆکوەزیرانی عێراق بەرەو سعودیە بەڕێکەوت.

 

وێنە گەورەکە: بڕیارە ئەمڕۆ دووشەممە 11-11-2024، لوتکەی نائاسایی عەرەبی ئیسلامی تایبەت بە پرسی غەززە و لوبنان، لە ڕیازی پایتەختی سعودیە بە بەشداری سەرۆک و شاندی وڵاتانی عەرەبی و ئیسلامی بەڕێوەبچێت، باس لەوە دەکرێت لە پەیامی کۆتاییدا خۆی لوتکەکە داوای هەنگاوی کردەیی بکات بۆ چارەسەری دوو دەوڵەت لەنێوان ئیسرائیل و فەڵەستین.

 

ڕاگەیێنراوی فەرمی: نووسینەگەی ڕاگەیاندنی سەرۆکوەزیرانی عێراق ڕایگەیاند: محەممەد شیاع سوودانی بە مەبەستی "بەشداریکردن لە لوتکەی هاوبەشی عەرەبی و ئیسلامی تایبەت بە تاوتوێکردنی دەستدرێژییەکانی سەر غەززە و لوبنان" بەغدای پایتەختی بەرەو ڕیاز بەجێهێشت.

 

ئەوەی لەوبارەیەوە دەگوترێت: پێش سەردانەکەی سوودانی بۆ سعودیە، موقتەدا سەدر، ڕێبەری ڕەوتی نیشتمانی شیعە لە پەیامێکدا هۆشداریی دایە حکومەتی عێراق، بۆ ئەوەی خۆی نەخزێنێتە نێو پرسی چارەسەری "دوو دەوڵەت" بۆ فەڵەستین و ئەمە بە پلانی ڕۆژئاوا زانی بۆ ڕیسواکردنیان و گوتیشی ئێمە دان بە ڕێککەوتنە بەریتانی و ڕۆژئاواییەکان نانێین.