لە دهۆك گەورەترین مۆزەخانە بە گوژمەی 100 ملیۆن دۆلار دروست دەكرێت

ئاڤا نیوز 

گەورەترین مۆزەخانە لەسەر ئاستی  هەرێمی كوردستان، بە ستانداردی جیهانی لە شاری دهۆك لەسەر ڕووبەری 82 دۆنم زەوی بە گوژمەی نزیکەی 100 ملیۆن دۆلار دروست دەکرێت.

لێدوانی فەرمی: بێکەس بریفکانی، بەڕێوەبەری شوێنەوار و کەلەپووری دهۆک بە ئاڤا نیوزی ڕاگەیاند: "مۆزەخانەكە هاوشێوەی مۆزەخانەی لۆڤەری پاریس دەبێت، هەوڵ دەدەین پاركی ئالوكا و مۆزەخانەكە تاوەكو چیای زاوا بەیەكەوە ببەستینەوە و ڕێگەیەكی پیادەڕۆ لەو نێوانە دروست بكەین، ئەمەش دەبێتە هۆی بەیەكەوەگرێدانی پاركێكی سروشتی و پاركێكی شوێنەواری كە هۆكارێك دەبێت بۆ ڕاكێشانی زۆرترین ژمارەی گەشتیار بۆ پارێزگای دهۆك".

زانیاریی زیاتر: مۆزەخانەكە چەندین بەش و هۆڵی تایبەت بە هەڵگرتنی پارچەی شوێنەواری تێدا دەبێت، لە قۆناغی یەكەمدا تەنیا پارچە زەوییەكە هەڵبژێردراوە و ڕەزامەندی لەسەر دروستكردنی دراوە، ئەگەر بەپێی ستانداردی جیهانی دروست بكرێت گوژمەی دروستكردنی مۆزەخانەكە زیاتر دەبێت لە 100 ملیۆن دۆلار دەبێت.

باكگراوند: مۆزەخانەی لۆڤەر، لە گرنگترین و گەورەترین مۆزەخانە مێژوویی و هونەری و کولتوورییەکانی جیهانە، دەکەوێتە پاریسی پایتەختی فەرەنسا، تابلۆی ناوداری مۆنالیزای تێدایە کە نیگارکێشی ناوداری ئیتاڵی لیۆناردۆ داڤینشی لە سەدەی شازدەیەم وێنەی كێشاوە.