عەبدوڵڵا حاجی مەحموود ڕووخاندنی خانووەکەی لە گوڵەخانە پشتڕاست دەکاتەوە

ئاڤا نیوز

 

عەبدوڵڵا حاجی مەحموود، وەزیری شەهیدان و كاروباری ئەنفالكراوان، ئاشكرای دەكات ئەمڕۆ لەلایەن محەممەدی برایەوە خانووەكەی ڕووخێندراوە.

 

وێنە گەورەکە: دوای ئەوەی ئاسایشی هەڵەبجە خانووەکەی عەبدوڵڵای حاجی مەحموودی لە گوڵەخانە ڕادەستی محەممەدی حاجی مەحموود، سكرتێری پارتی سۆسیالیست دیموكراتی كوردستان كردەوە ڕۆژی دووشەممە 11-11-2024 بە شۆفڵ و حەفارە دەستی بە ڕووخاندنی خانووی براكەی كرد.

 

بڵاوكراوەی فەرمی: عەبدوڵڵا حاجی مەحموود سەبارەت بە ڕووخاندنی خانووەكەی ڕایگەیاند: دوای ئەوەی ئاسایشی هەڵەبجە خانووەكەمیان لە گوڵەخانە ڕادەست كردەوە، لەلایەن محەممەد حاجی مەحموود و هێزەکەى جارێکى تر خانووەکەم داگیر كرایەوە، ئەمڕۆ بە ئامێرى ڕووخاندنى خانوو (دەقاق) دەستیان کرد بە ڕووخاندنى خانووەکەم، سەرجەم لایەنە پەیوەندیدارەکانى حکومەتى هەرێمى کوردستانم بە فەرمى لێ ئاگادار کردەوە و ڕێکكارى یاساییشم گرتەبەر.

 

ئاماژەی بەوەش کرد، هیچ کەس و لایەنێک بۆى نییە بەبێ مۆڵەتى فەرمى دادگا زێدەڕۆیی بکاتە سەر موڵک و ماڵى هەر هاووڵاتییەک، ئێمە بۆ پاراستنى ژیانى خەڵکى ناوچەکە و پێشمەرگەکان خۆمان بەدوور گرت و بەجێمان هێشت بۆ لایەنى پەیوەندیدار، لەهەمان کاتدا هیچ گرژییەک لە ئارادا نەبووە و هیچ بەهانەیەک نەبوو تا پاساو بهێنێتەوە بۆ ئەو کارە قێزەونە.

 

لەلایەکی دیکەوە: عەبدوڵڵا حاجی مەحموود داواش لە لایەنگرانی بزووتنەوەى سۆسیالیستى کوردستانى-عێراق دەكات خۆڕاگر بن و دان بە خۆیاندا بگرن.