پرۆسەی سەرژمێری لە کەمپی ئاوارەکان لە دهۆک دەستپێدەکات

ئاڤا نیوز

 

ڕێکارە گشتگیرەکانى سەرژمێرى لە کەمپی ئاوارەکان لە سنوورى پارێزگای دهۆک لە چوارچێوەی ئامادەکارییە نیشتمانییەکان بۆ سەرژمێرى گشتى لە عێراق دەستیپێکردووە.

 

وێنە گەورەکە: بڕیارە ڕۆژی 20-11-2024، پرۆسەی سەرژمێری گشتیی لە سەرتاسەری عێراق بە هەرێمی کوردستانیشەوە بەڕێوەبچێت. سەرژمێرییەکە ئاوارەکان لەنێو کەمپەکان و دەرەوەی کەمپەکانیش دەگرێتەوە.

 

لێدوانی فەرمی: دیان جەعفەر، بەڕێوەبەری فەرمانگەی کۆچ و کۆچبەران لە پارێزگای دهۆک ڕایگەیاند: فەرمانگەکەمان ئاسانکاری و پاڵپشتی پێویستی پێشکەش بەو تیمانەی سەرژمێری کردووە، کە لە ناو کەمپەکان و دەرەوەی کەمپەکان دەستیان بە کارکردن کردووە، بە ئامانجی تۆمارکردنی داتای ورد سەبارەت بە ژمارەی ئاوارەکانی پارێزگاکە.

 

زانیاریی زیاتر: بە گوتەی دیان جەعفەر، لە ماوەی 10 ڕۆژی داهاتوودا پڕۆسەکە کۆتایی دێت.

 

ئەمەش بزانە:  پارێزگای دهۆک 15 کەمپی ئاوارەکان لەخۆدەگرێت، نزیکەی 55 هەزار و 875 ئاوارە لەناو و دەرەوەی ئەو کەمپانە دەژین.