هەژماركردنی ئەنجامی سەرژمێری ناوچەكانی ماددەی 140 مەرجدار دەکرێت

ئاڤا نیوز

 

ئەنجوومەنی وەزیرانی عێراق، ئەنجامی سەرژمێری ناوچە كوردستانییەكانی دەرەوەی ئیدارەی هەرێمی کوردستان بە لیژنەیەك دەسپێرێت و سەرژمێری ساڵی 1957ـیش دەكاتە مەرج بۆ هەژماركردنی.

 

چیرۆکی سەرەکی: ئەنجوومەنی وەزیرانی عێراق لەمیانی كۆبوونەوەی ئەمڕۆیدا بڕیاری دا، ئەنجامی سەرژمێری ناوچە كوردستانییەكانی دەرەوەی ئیدارەی هەرێم كە بە ناوچەكانی ماددەی 140 ناسراون، هەژمار نەكرێت، تا ئەو كاتەی لیژنەیەك ئەوە یەكلا دەكاتەوە كە ئەو كەسانەی تۆماركراون خەڵكی ڕەسەنی ناوچەكەن و لە سەرژمێری ساڵی 1957 ناویان لەو ناوچانە هەبووە.

 

لەلایەكی دیكەوە: سەركردایەتیی سیاسیی كورد لە چەند بۆنەیەکی جیادا ئەوەیان ڕایانگەیاندووە، لەگەڵ بەڕێوەچوونی پرۆسەی سەرژمێری عێراقن، بەڵام چەند تێبینییەكیان هەیە و یەكێك لە سەرەكیترین تێبینییەكان شێوازی بەڕێوەچوونی پرۆسەكەیە لە ناوچە كوردستانییەكان، بەهۆی ئەوەی لە ساڵانی ڕابردوو بە هەزاران خانەوادەی كورد لەو ناوچانە بەهۆی مەترسیی لەسەر ژیانیان ڕوویان لە هەرێمی كوردستان كردووە.

 

گۆشەیەكی دیكەی دیمەنەکە: سەبارەت بە پرۆسەی سەرژمێری، سەرۆكوەزیران مەسرور بارزانی، ڕۆژی سێشەممە 12-11-2024 لە دیدارێكیدا لەگەڵ پاتریك دۆرێك، باڵیۆزی فەڕەنسا لە عێراق دووپاتیکردەوە کە "هەرێمی کوردستان پشتیووانی لە پرۆسەکە دەکات بۆ مەبەستی گەشەپێدان، بەڵام سەرنج و تێبینیشی لەسەر پرۆسەکە هەیە کە پێویستە بەلاڕێدا نەبرێت و بۆ مەبەستی سیاسیی بەکار نەهێنرێت".