پارێزگاری کەرکووک: کێشەی زەویی جووتیارانی کورد بە یاسا چارەسەر دەکرێن

ئاڤا نیوز

 

کێشەی زەویی و زاری جووتیارانی کورد لە کەرکووک تا ئێستا یەکلایی نەبۆتەوە کە بەهۆی بڕیارێکی ڕژێمی پێشووی بەعس زەویی جووتیارانی کورد لەسەر عەرەبی هاوردە تاپۆ کراون.

 

وێنە گەورەکە: ڕێبوار تەها، پارێزگاری کەرکووک لە کۆنگرەیەکی ڕۆژنامەوانیدا، ڕایگەیاند: ئەمڕۆ دوو کۆبوونەمان لەبارەی کێشەی زەوی و زاری جووتیارانی کورد لە کەرکووک لەگەڵ فەرماندەیی عەمەلیاتی کەرکووک و جووتیارانی کورد و عەرەب ئەنجامدا، بۆ ئەوەی ڕێگەچارەیەک بۆ ئەم کێشەیە بدۆزینەوە.

 

پارێزگاری کەرکووک ئاماژە بەوەش دەکات، "لە کۆیی گشتیی ئەو زەوییانەی کێشەی لەسەرە، هەزار و 500 دۆنم زەوی دەبێت، بەڵام 18 هەزار دۆنم زەویی دیکە کێشەی لەسەر نییە، دەبێت چارەسەر بکرێن و ڕادەستی خاوەنەکانیان بکرێت، بۆ ئەم مەبەستە فەرمانگەی کشتوکاڵی کەرکوووکم ڕاسپاردووە بە ڕاپۆرتێک تەواوی کێشەکە بۆ پارێزگای کەکووک بنێرن تاوەکو لەگەڵ ئەندامانی پەرلەمانی عێراق بە یاسا کێشەکان چارسەر بکرێن".

 

ئەوەی پێویستە بیزانیت: ئەو زەوییانەی کەرکووک لە سەردەمی ڕژێمی پێشووی بەعس بە یاسا بە ناوی عەرەبەکان کراوە، بۆ هەڵوەشادنەوەی بڕیارەکە دەبێت لە پەرلەمانی عێراق دووبارە بڕیاری لەسەر بدرێت و بە یاسا چارەسەر بکرێت و ئەوانەی زیانیان بەرکەوتووە قەرەبوو بکرێنەوە.