كونسوڵی ئێران: سەقامگیریی هەرێمی کوردستان بۆ ئێمە گرنگە

ئاڤا نیوز

 

نەسڕوڵڵا ڕەشنودی، كونسوڵی گشتیی ئێران لە هەولێر لە چاوپێکەوتنێکی تایبەتدا لەگەڵ ئاڤا ڕایگەیاند، سەقامگیریی هەرێمی  کوردستان بۆ ئێمە گرنگە.

 

لێدوانی فەرمی: نەسڕوڵڵا ڕەشنودی، سەبارەت بە پرسی پێكهێنانی حكومەتی هەرێمی كوردستان بە ئاڤای ڕاگەیاند: ئێران هەمیشە لە تەنیشت حکومەتی هەرێمی کوردستان بە ئاراستەی هێنانە ئارای سەقامگیریی لە هەرێمی کوردستان هەنگاوی ناوە و هەوڵی داوە، چونکە سەقامگیریی هەرێمی کوردستان بۆ ئێمە گرنگە، ئەمڕۆش بەهەمان شێوە لە هەر شوێنێک کە پێویست بێت ئێمە یارمەتیدەر دەبین.

 

لەلایەكی دیكەوە: لە بەشێکی دیکەی چاوپێکەوتنەکەیدا لەگەڵ ئاڤا میدیا, كونسوڵی ئێران گوتی: "بۆ ئێمە گرنگە کە حکومەتی هەرێمی کوردستان سەقامگیر بێت، بەڕاستیش بەڕێوەچوونی هەڵبژاردن و ئاسایشی هەڵبژاردن و کارنامەی هەڵبژاردنەکان شتی زۆر نوێ بوو بۆ ئێمەش، ئێمە هەڵبژاردنەکانی ڕابردووشمان بینیوە، ئەمجارە لەم هەڵبژاردنەدا بانگەشەکانی هەڵبژاردن زۆر جێگەی سەرنج بوون، بەڵام لە هەمووی گرنگتر ئاسایشی هەڵبژاردنەکان بوو کە زۆر باش بوو و جێگەی پیرۆزباییە".

 

گۆشەیەكی دیكە: نەسڕوڵڵا ڕەشنودی ئاماژەی بۆ ئەوەش کرد: حکومەتی هەرێمی کوردستان لە چوارچێوەی عێراقدا بۆ ئێمە ناسراو و جێگەی ڕێزە، هەر لەبەر ئەمەشە کە ئێمە لە چوارچێوەی عێراقدا پەیوەندییەکانمان لەگەڵ حکومەتی هەرێمی کوردستان ڕێک دەخەین، هیچ ڕێگرییەکیشمان لەم بارەیەوە نییە و تا ئێستاش نەمانبووە.