دۆسیەی نەوت تەوەرێکی سەرەکی سەردانەکەی سوودانییە بۆ هەرێمی کوردستان

ئاڤا نیوز

دوای بڕیاری حکومەتی عێراق بۆ دەستپێکردنەوەی هەناردەی نەوتی هەرێمی کوردستان و هەمواری بڕگەیەکی یاسای بودجە کە تایبەتە بە نەوت، لە سەردانەکەی ئەمڕۆی سوودانیدا بۆ هەرێمی کوردستان دۆسیەی نەوت تەوەرێکی سەرەکی کۆبوونەوەکان دەبێت.

وێنە گەورەکە: 5ی ئەم مانگە ئەنجوومەنی وەزیرانی عێراق بڕیاری دا هەناردەی نەوتی هەرێمی کوردستان دەستپێبکاتەوە و تا وردبینیش لە بەرهەمهێنان و گواستنەوەی نەوتی کوردستان تەواو دەبێت، بەغدا بۆ هەر بەرمیلێک بەرهەمهێنان و گواستنەوەی نەوت 16 دۆلار خەرج دەکات.

لێدوانی فەرمی: سەباح حەیدەر، ئەندامی لیژنەی نەوت و گاز لە پەرلەمانی عێراق بە ئاڤا میدیای ڕاگەیاند، دۆسیەی نەوت بەشێکی گرنگە لە پەیوەندییەکانی نێوان هەولێر و بەغدا و لە سەردانەکەی ئەمڕۆی سوودانیدا بۆ هەرێمی کوردستان یەکێک دەبێت لەو دۆسیانەی گفتوگۆی لەسەر دەکرێت.

لەلایەکی دیکەوە: بەگوێرەی ئەو زانیارییانەی ئاڤا میدیا دەستیکەوتوون، سوودانی لە سەردانەکەیدا بۆ هەولێر، چەند پرسێکی دیکە لەگەڵ بەرپرسانی هەرێمی کوردستان تاوتوێ دەکات، لەوانە: ئەنجامدانی سەرژمێری، چارەسەرکردنی کێشەکانی نێوان هەولێر و بەغدا  بەتایبەت بودجە و مووچە، پێکهێنانی حکومەتی نوێی هەرێمی کوردستان، پرۆژەی ڕێگای گەشەپێدان، دۆخی ناوچەکە دوای دەرچوونەوەی دۆناڵد ترەمپ، کێشەی زەوی جووتیارانی کورد لە ناوچە کوردستانییەکانی دەرەوەی ئیدارەی هەرێمی کوردستان.