سەرۆکوەزیران مەسرور بارزانی: بابەتی گرنگ هەن لەگەڵ سوودانی باسی بکەین

ئاڤا نیوز

سەرۆکوەزیران مەسرور بارزانی پەیامێک لەبارەی سەردانی سوودانی بۆ هەرێمی کوردستان بڵاودەکاتەوە و ڕایدەگەیێنێت، بابەتی گرنگ هەن پێکەوە گفتوگۆی لەبارەوە بکەن.

پەیامی فەرمی: سەرۆکوەزیران مەسرور بارزانی لە تۆڕی کۆمەڵایەتیی ئێکس بڵاوی کردووەتەوە: "خۆشحاڵم بە سەردانی سەرۆکوەزیران محەمەد شیاع سوودانی بۆ هەرێمی کوردستان. بابەتی گرنگی پەیوەندیدار بە شایستە داراییەکانی هەرێم و سەرژمێریی گشتیی دانیشتووان و ئاسایش و وزە و بەرەوپێشچوونی ئابووری هەن کە گفتوگۆی لەبارەوە دەکەین". 

ئەوەی پێویستە بیزانیت: کاتژمێر 09:00ـی بەیانیی ئەمڕۆ چوارشەممە محەممەد شیاع سوودانی گەیشتە هەولێر و لەلایەن سەرۆکوەزیران مەسرور بارزانی پێشوازی لێ کرا، لەگەڵ هەریەک لە سەرۆک بارزانی و نێچیرڤان بارزانیش کۆدەبێتەوە، دوانیوەڕۆش سەردانی سلێمانی دەکات و لەگەڵ سەرۆکی یەکێتی کۆدەبێتەوە. سوودانی لە هەولێر و سلێمانی چاوی بە ژمارەیەک سەرۆک حیزبی دیکەش دەبێت.