هەولێر ڕۆژێکی گەرمی سیاسی و گرنگ بەڕێ دەکات

ئاڤا نیوز


هەولێر ڕۆژێکی گەرمی سیاسی و گرنگ بەڕێ دەکات.  محەممەد شیاع سوودانی، سەرۆکوەزیرانی عێراق بۆ گفتوگۆکردن لەسەر چەند پرسێکی گرنگ لە هەرێمی کوردستانە، نەوت یەکێکە لەو تەوەرە سەرەکییانەی لە نێوان هەردوو سەرۆکوەزیرانی عێراق  و هەرێمی کوردستان  تاوتوێ دەکرێت.

 

لێدوانی فەرمی: مایڵز کاگینز، وتەبێژی کۆمەڵەی پیشەسازی نەوتی هەرێمی کوردستان (ئەپیکۆر) لەبارەی پرسی چارەسەرکردنی کێشەی نەوت و سەردانی سوودانی بە ئاڤا نیوزی گوت: "ئەم کۆبوونەوەیە گرنگە و ئەرێنی دەبێت، ئێستا تورکیا، بەغدا، هەولێر و کۆمپانیا نێودەوڵەتییەکان ئامادەن بۆ هەناردەکردنەوەی نەوت، لەلایەکی دیکەشەوە پێشهاتەکان بەشیوەیەکی ئەرێنیتر دێنە پێشەوە".

باکگراوند: زیاتر لە ساڵێک و حەوت مانگە هەناردەکردنی نەوتی هەرێمی کوردستان لەلایەن دادگای پاریسەوە ڕاگیراوە و تاوەکو ئێستاش وێڕای ئامادەیی حکومەتی هەرێمی کوردستان دەستی پێنەکردووەتەوە. لەبارەی زیانەکانیش وتەبێژی ئەپیکۆر دەڵێت زیاتر لە 21 ملیار دۆلار زیانی بە هەولێر و بەغدا و کۆمپانیاکان گەیاندووە.

خاڵی ئەڕێنی: هەموو لایەک ئامادەن بۆ ڕێککەوتن و دەستپێکردنەوەی هەناردەکردنی نەوت، چاوەکانیش لەسەر ئەنجامی کۆبوونەوەی سوودانی و سەرۆکوەزیران مەسرور بارزانی، چاوەڕوان دەکرێت ئەگەر عێراق هیچ بیانوێکی دیکە نەدۆزێتەوە، ئەم کۆبوونەوانە ببنە سەرەتایەکی نوێ بۆ هەناردەکردنی نەوت.