سوودانی گەیشتە سلێمانی و پێنج کۆبوونەوەی دەبێت

ئاڤا نیوز

 

كەمێك پێش ئێستا، محەممەد شیاع سوودانی، سەرۆكوەزیرانی عێراق گەیشتە شاری سلێمانی و لەلایەن بەرپرسانی حکومی و حیزبیەوە پێشوازی لێکرا.

 

زانیاریی بەدەستهاتوو: ئێوارەی ئەمڕۆ چوارشەممە 13-12-2024، محەممەد شیاع سوودانی، سەرۆکوەزیرانی عێراق دوای سەردانی هەولێر، گەیشتە فڕۆکەخانەی سلێمانی و لەلایەن بافڵ جەلال تاڵەبانی، سەرۆکی یەکێتی و قوباد تاڵەبانی جێگری سەرۆكوەزیرانی هەرێمی كوردستان و هەڤاڵ ئەبوبەكر، پارێزگاری سلێمانییەوە پێشوازیی لێكرا.

 

زانیاریی تایبەت: بەگوێرەی زانیارییەکان لەسەردانەکەیدا بۆ سلێمانی، سوودانی لەگەڵ بافڵ تاڵەبانی، سەرۆکی یەکێتیی نیشتمانیی کوردستان، سەڵاحەددین محەممەد بەهائەدین، ئەمینداری یەکگرتووی ئیسلامیی کوردستان، شاسوار عەبدولواحید، سەرۆکی جووڵانەوەی نەوەی نوێ، لاهوور شێخ جەنگی، سەرۆکی بەرەی گەل و  عەلی حەمە ساڵح، بڕیاردەری ڕەوتی هەڵوێست كۆببێتەوە.

 

زانیاریی پەیامنێر: ژیوار عەبدولرەحمان، پەیامنێری ئاڤا لە سلێمانی ڕایگەیاند: تەوەری سەرەكیی گفتوگۆكانی سوودانی لەگەڵ بەرپرسانی لایەنە سیاسییەكان پێكهێنانی حكومەتی هەرێمی كوردستان دەبێت.

 

باکگراوند: ئەمڕۆ سەرۆکوەزیرانی عێراق بە سەردانێک گەیشتە هەرێمی کوردستان و لە هەولێر لەگەڵ سەرۆک بارزانی، مەسرور بارزانی، سەرۆکوەزیرانی هەرێمی کوردستان، نێچیرڤان بارزانی، سەرۆکی هەرێمی کوردستان و عەلی باپیر، سەرۆکی کۆمەڵی دادگەری کۆبووەوە.