یەکێتی داوای پۆستەکانی سلێمانی و هەڵەبجە لە بزووتنەوەی گۆڕان دەکاتەوە

ئاڤا نیوز

 

یەکێتی لە سلێمانی و هەڵەبجە داوای 143 پۆست لە بزووتنەوەی گۆڕان دەکاتەوە و بەرپرسێکی باڵای ئەو حیزبە دەڵێت, ناکرێت گۆڕان ئۆپۆزیسیۆن بێت و پارێزگاریشی لابێت.

وێنە گەورەکە: دوای دوو ساڵ لە ئەنجامدانی هەڵبژاردنی ئەنجوومەنی پارێزگاکانی هەرێمی کوردستان، ساڵی 2016 ئەوکاتەی گۆڕان خاوەنی 24 کورسی بوو لە پەرلەمانی کوردستان، بە ئامادەبوونی مام جەلال و نەوشیروان مستەفا لە دەباشان ڕێککەوتنێک بۆ ئیدارەدانی پارێزگاکانی سلێمانی و هەڵەبجە کرا و پۆستەکان پەنجا بە پەنجا دابەش کران، تاوەکو ئێستاش 140 پۆستی ئەو دوو پارێزگایە لای بزووتنەوەی گۆڕانن، کە پێکدێن لە پارێزگاری سلێمانی، 12 قایمقام، 22 بەڕێوەبەری ناحییە، 18 بەڕێوەبەری گشتیی و ئەوانی دیکەش ڕاوێژکارن.

ئەوەی پێویستە بیزانیت: دوای دیاریکردنی دانا ئەحمەد مەجید وەک ڕێکخەری گشتیی بزووتنەوەی گۆڕان لەلایەن باڵی عومەری سەید عەلی، مانگی ڕابردوو بڕیاری کشانەوە لە حکومەت و ئۆپۆزیسیۆنبوونی ڕاگەیاند، لە هەڵبژاردنیش یەک کورسی هێنا. ئێستاش یەکێتی داوای پۆستەکان دەکاتەوە.

 

لێدوانی فەرمی: بەرپرسێکی باڵای یەکێتی بە ئاڤا نیوزی ڕاگەیاند، "بە قسەکردنیش نەبێت خۆ ئاماژەکان دیارن، بەدڵنیاییەوە گۆڕان ببێت بە ئۆپۆزیسیۆن هەموو پۆستەکانی لێ وەردەگرینەوە و دەبێت ڕادەستی بکەنەوە، بەڵام ئەم گۆڕانکاریانە لە کاتی حکومەتی نوێ دەکرێن، خۆ ناکرێت گۆڕان ئۆپۆزیسیۆن بێت و پۆستی پارێزگاری سلێمانی لابێت".

 

بۆچوونی لایەنی بەرامبەر: لەبەرامبەردا دانا ئەحمەد مەجید، ڕێکخەری گشتیی بزووتنەوەی گۆڕان بە ئاڤا نیوزی گوت: "ئەم قسەیە هیچ بنەمایەکی نییە، کەسیشم نەبینیوە تاوەکو قسەی لەگەڵ بکەم".

 

ئەوەی لەو بارەیەوە دەگوترێت: هەر لەسەر ئەم پرسە جەلال مستەفا، سەرۆکی جڤاتی گشتیی گۆڕان کە لە باڵی کوڕانی نەوشیروان مستەفایە بە ئاڤا نیوزی گوت: "لە گردی زەرگەتە هیچی وام نەبیستووە، باڵی کوردسات پێش هەڵبژاردن وتیان لە پۆستەکان دەکشێینەوە، بەڵام کشانەوەیان بەناو بوو.

 

ئەمەش بزانە: لەلایەکی دیکەوە لەبارەی یەکگرتنەوەی گۆڕان و یەکێتی جەلال مستەفا دەڵێت: "ئێستا گۆڕان دوو بەش و دوو ئیدارەیە و هەردووکیشیان لە یەکێتی نزیکن، بەڵام بەو ڕادەیە نییە کە ببن بە یەکێتی، ئەگەر سبەی تەنسیق و بەرژەوەندییەک نزیکتریان بکاتەوە، ئەمەیان نازانم."