ئاسایشی هەولێر زێڕنگەرێكی "ساختە" دەستگیر دەكات

ئاڤا نیوز

 

بەڕێوەبەرایەتیی ئاسایشی هەولێر، لە ڕاگەیێنراوێكدا ئاشكرای دەكات، كەسێكیان دەستگیر كردووە كە خۆی كردووە بە زێڕنگەر و پەیوەندیی لەگەڵ ژمارەیەك ئافرەت داناوە و وێنە و ڤیدیۆی نەشیاوی پێ تۆمار كردوون.

 

ڕاگەیێنراوی فەرمی: ئاسایشی هەولێر ڕایگەیاند: بە فەرمانی دادوەری لێکۆڵینەوەی ئاسایشی هەولێر تۆمەتبار (ع ، م ، ع) دەستگیر كرا كە لە تۆڕی کۆمەڵایەتیی سناپچات  هەژمارێكی بە ناوی (زێڕنگیری سان) دروست كردووە و بە ناوی کاری زێڕنگەرییەوە لەگەڵ چەند ئافرەتێک پەیوەندیی داناوە.

 

لەلایەكی دیكەوە: ئاسایشی هەولێر، ئاماژەی بە ئەوەش داوە كە ئەو تۆمەتبارە بە هەڕەشە وێنە و گرتە ڤیدیۆیی بە ئافرەتەكان تۆمار كردووە لە حاڵەتێكدا ئەگەر پارەیان پێ نەدابێت یان داواکارییەکەیان بۆ جێبەجێ نەکردبێت وێنە و ڤیدیۆكانی لە تیكتۆك بڵاو كردووەتەوە.

 

زانیاریی زیاتر: بەپێی ڕاگەیێنراوی ئاسایشی هەولێر، تۆمەتبارەكە لە بنەڕەتدا پیشەی زێڕنگەر نەبووە و  لەو بوارەشدا کاری نەکردووە، ئاسایشی هەولێر داواش دەكات كە هەر كەسێك سكاڵای یاسایی لەسەر تۆمەتبارەكە هەبێت سەردانی بەڕێوەبەرایەتییەكە بكات.