ئاڤا نیوز زانیاری گرنگ و نەزانراو لەبارەی پرۆسەی سەرژمێری ئاشكرا دەكات

ئاڤا نیوز

 

هاووڵاتیانی ناوچە كوردستانییەكانی دەرەوەی ئیدارەی هەرێم و ماددەی 140، لە هەر شوێنێكی نیشتەجێبوون لە پرۆسەی سەرژمێری خۆیان تۆمار بكەن، هەر لەسەر شوێنی ڕەسەنی خۆیان هەژماردەكرێن بەو مەرجەی لە ئاماری ساڵی 1957 تۆماركراو بن و گرفتیان نەبێت.

 

لێدوانی فەرمی: موحسین شوانی، ڕاهێنەری سەرژمێریی لە تیمەکانی پرۆسەی سەرژمێریی ناوچە كوردستانییەكانی دەرەوەی ئیدارەی هەرێم، تایبەت بە ئاڤا نیوز ڕایگەیاند، هەر هاووڵاتییەك گرنگ نییە كارتی نیشتمانیەكەی یاخوود كارتی زانیاری و پسوولەی خۆراكی لە كام شوێن بێت هەر لەو شوێنە سەرژمێری بكات، بەڵكو لە شوێنی نیشتەجێبوونی ئێستای خۆی دەتوانێت بەشداری پرۆسەكە بكات و لەكاتی هاتنی تیمەكان خۆی تۆمار بكات، دواتر بەگوێرەی ئاماری ساڵی 1957 لەسەر زێدی ڕەسەنی خۆی هەژماردەكرێت.

 

ئەوەی پێویستە بیزانیت: تیمەكانی سەرژمێری ڕوونكردنەوەی پێویست بە هاووڵاتیانی ناوچە كوردستانییەكانی دەرەوەی ئیدارەی هەرێم دەدەن، بەوەی كە لە ڕۆژانی 16 تا 19/ 11/ 2024 سەرۆك خێزان دەتوانێت لەجیاتی سەرجەم ئەندامانی خێزانە بگەڕێتەوە زێدی خۆی و لەڕێگەی تیمەكانی سەرژمێرییەوە خۆی تۆماربكات، یاخود دەتوانێت لەڕێگەی خزمێكی نزیكییەوە بەڵگەنامە فەرمییەكانی ڕەوانەی شوێنی ڕەسەنی خۆی بكاتەوە كە ئێستا لەو ناوچانە نیشتەجێیە و، بەبێ گەڕانەوەی خانەوادەكە، لە شوێنی ڕەسەنی خۆیان تۆمار دەكرێن و لەكاتی تۆماركردنییان تەنیا ژمارەی خێزان كە لەسەر كارتی نیشتیمانی هەیە، لەبەرچاو دەگیرێت.

 

ئەوەش بزانە: كارتی زانیاری، پسوولەی خۆراك هیچ بایەخێكی لە پرۆسەی سەرژمێری نابێت، زیاتر كار بە كارتی نیشتیمانی یاخود ناسنامەی باری كەسی دەكرێت.