مقاوەمەی عێراقی لە بەرەبەیانەوە پێنج هێرشی کردووەتە سەر ئیسرائیل

ئاڤا نیوز

 

سەرەڕای هۆشداریی ئەمریکا بۆ عێراق، مقاوەمەی ئیسلامی لە عێراق بەردەوامە لە هێرشکردنە سەر پێگەکانی ئیسرائیل و تاوەکو دێت ژمارەی هێرشەکانی زیاتر دەکات.

 

وێنە گەورەکە: بەهۆی هێرشی نیمچە ڕۆژانەی گرووپە چەکدارەکانی عێراقەوە بۆ سەر ئیسرائیل، چەندجارێکە ئەمریکا هۆشداری بە عێراق داوە بۆ ئەوەی کۆنترۆڵی ئەو گرووپانە بکات، ئەگینا ناتوانن بەر لە ئیسرائیل بگرن لە هێرشکردنە سەر ئەو هێزانە لە خاکی عێراق، لە بەرامبەریشدا مقاوەمەی ئیسلامی لە عێراق بەردەوامە لە هێرشەکانی.

 

ڕاگەیێنراوی فەرمی: بەرەی مقاوەمەی ئیسلامی لە عێراق ڕایگەیاند: بەرەبەیانی ئەمڕۆ پێنجشەممە 14-11-2024 لە ڕێگەی پێنج درۆنەوە چەند ئامانجێکی گرنگ و سەربازییان لە باشووری ئیسرائیل کردووەتە ئامانج.

 

کاریگەری و لێکەوتەکان: ڕۆژی دووشەممەی هەفتەی ڕابردوو 05-11-2024، لە پەیوەندییەکی تەلەفۆنیدا ئەنتۆنی بلینکن، وەزیری دەرەوەی ئەمریکا داوای لە محەممەد شیاع سوودانی، سەرۆکوەزیرانی عێراق کرد کۆنترۆڵی گرووپە چەکدارەکان بکات لە بەکارهێنانی خاکی عێراق بۆ هێرشکردنە سەر ئیسرائیل و هێزەکانی ئەمریکا لە ناوچەکە.

 

لەلایەکی دیکە: بەرەی مقاوەمەی ئیسلامی بەرپرسیاریێتی ئەو هێرشانەش لە ئەستۆ دەگرێت کە ناوە ناوە دەکرێتە سەر بنکە سەربازییەکانی ئەمریکا لە عێراق و سووریا وەک وەڵامێک بۆ هێرشەکانی ئیسرائیل بۆسەر کەرتی غەززە.