تیمی هاوکاریی بۆ خەڵکی ناوچە کوردستانییەکان دروست دەکرێت

ئاڤا نیوز

 

تیمی حیزبی و حکومی لەلایەن پارتییەوە بۆ هاوکاریکردنی ئەو خەڵکە دروست کراوە، کە بۆ سەرژمێریی دەگەڕێنەوە ناوچە کوردستانییەکان و پێداویستییەکانیان بۆ فەراهەم دەکەن.

 

وێنە گەورەکە: ڕۆژی 16-11-2024، لایەنە کوردستانییەکان لە مەخموور کۆبوونەوە، بۆ ئەوەی کار لەسەر هاندانی خەڵک و کار ئاسانی بۆ گەڕانەوەیان و بەشداریکردنیان لە سەرژمێری زێدی خۆیان بکەن.

 

زانیاریی بەدەستهاتوو: بە بڕیاری ئەنجوومەنی وەزیرانی عێراق، هەر کەسێک نیشتەجێی شارێک بێت و لەبنەڕەت دا خەڵکی شارێکی دیکە بێت، دەتوانێت لەو شوێنەی نیشتەجێیە سەرژمێری بکات.

 

لێدوانی فەرمی: سەنگەر کانەبی، بەرپرسی لقی پارتی لە قەرەچووغ، بە ئاڤا نیوزی گوت: دەپرسین ئایا بڕیارەکەی حکومەتی عێراق جێبەجێ دەکرێت؟، چونکە زۆر پرسی دەستووری هەیە و حکومەتی عێراق جێبەجێی نەکردووە.

 

ئەو بەرپرسەی پارتی دەڵێت: تیمی حزبی و حکومی دروست کراوە، تاوەکو هەموو ئاسانکارییەک بۆ خەڵک بکرێت و پێداویستییەکانیان بۆ دابین بکەن.

 

زانیاریی زیاتر: کەمپی دیبگە زۆرینەی دانیشتووانەکەی خەڵکی سنوورەکەن و لە کاتی شەڕی داعشەوە لەوێ نیشتەجێن، هەرچەندە هەوڵی زۆر دراوە بچنەوە گوندەکانی بناری چیای قەرەچووغن، بەڵام لەبەر مەترسییەکان نەگەڕاونەتەوە.

 

ئەوەی پێویستە بیزانیت: بەڕێوەبەرایەتیی ئاماری هەولێر و مووسڵ بە هاوبەشی کاری سەرژمێری لە سنووری قەزای مەخموور دەکەن.

 

باکگراوند: بڕیارە ڕۆژانی 16 تاوەکو 21-11-2024، سەرژمێری گشتیی لە سەرتاسەری عێراق بە هەرێمی کوردستانیشەوە بەڕێوەبچێت.