بیمەی تەندروستی پێشمەرگە کێ دەگرێتەوە؟

ئاڤا نیوز

 

وەزارەتی پێشمەرگە خزمەتگوزاریی بیمەی تەندروستی بۆ پێشمەرگەکانی دابین دەکات، لە ڕێگەیەوە هاوکاریی پێشکەشی ئەو پێشمەرگانە دەکرێت کە پێویستییان بە چارەسەری نەخۆشی و نەشتەرگەری هەیە.

 

وێنە گەورەکە: لەڕێگەی خزمەتگوزارییەکەوە، بیمەی تەندروستی پێشکەش بەو پێشمەرگانە دەکرێت کە پێویستییان بە چارەسەر و نەشتەرگەری هەیە لە نەخۆشخانە حکومی و تایبەتەکان، هاوکات 70%ـی خەرجی بۆ ئەو پێشمەرگانە دەگەڕێندرێتەوە کە ڕێگەپێدانی پێشوەختەی هەبێت، ئەو پێشمەرگانەی کە ڕێگەپێدانیان نییە، لیژنەیەکی پزیشکی بەدواداچوونیان بۆ دەكات و تاوەکو 25%ی خەرجی چارەسەرەکەیان وەردەگرنەوە، ئەوانەشی نەخۆشیی درێژخایەنیان هەیە، دەتوانن چارەسەریی وەربگرن.

 

لێدوانی فەرمی: د. ڕەزا ئیسماعیل بەڕێوەبەری بەڕێوبەرایەتیی کاروباری پزیشکیی گشتیی پێشمەرگە بە ئاڤا نیوزی ڕاگەیاند، نزیکەی شەش مانگە خزمەتگوزارییەکە چووەتە بواری جێبەجێکردنەوە و بەردەوام پێشمەرگەکان لەڕێگەی ڕاپۆرتە پزیشکییەکانیانەوە داواکاری پێشکەش دەکەن، بۆ گەڕاندنەوەی خەرجی چارەسەری و نەشتەرگەرییەکانیان لە نەخۆشخانە حکومی و تایبەتەکان.

 

زانیاریی زیاتر: بەڕێوەبەری بەڕێوبەرایەتیی کاروباری پزیشکیی گشتیی پێشمەرگە، ژمارەی پێشمەرگە سوودمەندبووەکان و گوژمەی ئەو پارەیەش بۆ ئاڤا ئاشکرا دەکات کە گەڕێندراوەتەوە، بە گوتەی د. ڕەزا ئیسماعیل، 208 پێشمەرگە خەرجییەکانیان بۆ گەڕاوەتەوە و گوژمەی گشتیی پارەکەش زیاترە لە 147 ملیۆن دینار، هاوکات تەنیا ئەو پێشمەرگانە لێی سوودمەند دەبن کە لە چوارچێوەی لیوا هاوبەشەکانی وەزارەتی پێشمەرگەن.

 

گۆشەیەکی دیکە: خزمەتگوزارییەکە بۆ خزمەتی هێزەكانی پێشمەرگەی هەرێمی کوردستانە، لە داهاتووشدا خزمەتگوزارییەکە فراوانتر دەکرێت و جگە لە خودی پێشمەرگەكە، خێزانەکەشی دەتوانن سوود لەو خزمەتگوزارییە وەربگرن.