شاندێکی هەرێمی کوردستان دەچێتە ڕووسیا

ئاڤا نیوز

شاندێکی حکومەتی هەرێمی کوردستان بۆ بەشداریی لە کۆنفرانسی سانپترسپۆرگ سەردانی ڕووسیا دەکات، وتەبێژی دەستەی وەبەرهێنەرانیش دەڵێت: بە فەرمی هەرێمی کوردستان میوانداری کراوە.

 

وێنە گەورەکە: کۆنفڕانسی سانپترسپۆرگ، دیدارێکی ساڵانەیە بۆ بازرگانان و وەبەرهێنەران لە ڕووسیا ساز دەکرێت، هەر لە میانەی بەڕێوەچوونی دیدارەکەشدا چەندین پێشانگای بازرگانی دەکرێتەوە.

 

لیدوانی فەرمی: بەرگەشت ئاکرەیی، وتەبێژی دەستەی وەبەرهێنانی حکومەتی هەرێمی کوردستان، بە ئاڤا نیوزی ڕاگەیاند: شاندێکی هەرێمی کوردستان بۆ بەشداریی لە دیداری وەبەرهێنەرانی سانپترسپۆرگ سەردانی ڕووسیا دەکات، لەوێ دەمانەوێت لێکتێگەیشتن لەگەڵ وەبەرهێنەرانی جیهان و حکومەتەکان واژوو بکەین.

 

زانیاریی زیاتر: شاندەکە د.محەممەد شوکری سەرۆکی دەستەی وەبەرهێنان سەرپەرەشتی دەکات، دابان شەدەڵە جێگری بەرپرسی فەرمانگەی پەیوەندییەکانی دەرەوە و 20 وەبەرهێنەری نێوخۆیی لە زاخۆ تاوەکو کەلار تێیدا دەبن.

 

زانیاریی بەدەستهاتوو: بڕیارە شاندەکەی هەرێمی کوردستان هەفتەی داهاتوو سەردانی سانپترسپۆرگ بکەن.

 

ئەوەی پێویستە بیزانیت: یەکەمجارە هەرێمی کوردستان بەشداریی کۆنفرانسی سانپترسپۆرگ دەکات و بەفەرمی میوانداری کراوە.