درۆن بە ئاسمانی كێڵگەی كۆرمۆر سووڕایەوە و لەلایەن هێزە ئەمنییەکانەوە تەقێنرایەوە

ئاڤا نیوز

بەپێی زانیارییەکانی پەیامنێری ئاڤا لە كەركووك، درۆن بەسەر كێڵگەی كۆرمۆر سووڕاوەتەوە و هێزە ئەمنییەكانیش تەقەیان لە درۆنەكە كردووە.

زانیاریی بەدەستهاتوو: سەرچاوەیەك بە پەیامنێری ئاڤای ڕاگەیاندووە، دەنگی درۆن دووجار لە ئاسمانی كێڵگەی كۆرمۆر بیستراوە، دەستبەجێ زەنگی ئاگاداركردنەوە لێدراوە هاوكات پاسەوانانی كێڵگەكە تەقەیان لە درۆنەكە كردووە.

لێدوانی فەرمی: سەرچاوەیەکی ئەمنی بە ئاڤای ڕاگەیاند، تەنیا یەک درۆن دووجار بە ئاسمانی کێڵگەی غازی کۆرمۆردا سوڕاوەتەوە، بەهۆیەوە زەنگی ئاگادارکردنەوە کە سیستەمێکی نوێی زیرەکەو ماوەی چەند مانگێکە جێگیرکراوە درۆنەکەی پێشوەختە ئاشکرا کردووە، دواتر درۆنەکە لەلایەن پاسەوانەکانی کێڵگەکە بەرپەرچ دراوەتەوەو بەر لەوەی بگات بە ئامانج تەقێنراوەتەوە، لە ئێستاد دۆخەکە بەرەو ئاسایی بوونەوە دەچێت و هیچ درۆنێک لە ئاسمانی کێڵگەی غازی کۆرمۆر بوونی نیە.

باكگراوند: کێڵگەی گازی کۆرمۆر دەکەوێتە سنووری ناحیەی قادرکەرەم لە پارێزگای سلێمانی. لە ساڵی 2003ـەوە لەژێر کۆنترۆڵی حکومەتی هەرێمی کوردستاندایە. لە ئۆکتۆبەری 2008ـەوە دەست کراوە بە بەرهەمهێنانی گاز تیایدا، بەرهەمی ڕۆژانەی 450 ملیۆن پێ سێجایە و بڕیارە تا کۆتایی ئەمساڵ ئەو بڕە بۆ 500 ملیۆن پێ سێجا بەرز ببێتەوە. ڕێژەیەكی زۆری كارەبای هەرێمی كوردستان لەڕێگەی ئەو كێڵگەیەوە بەرهەم دەهێنرێت، یەدەگی ئەو گازە سروشتییەی لە كۆرمۆردا هەیە، بە یەک ترلیۆن و 800  ملیار پێ سێجا دەخەمڵێندرێت.