مێژووی 120 ساڵی كورد لە ئەمریكا بڵاو دەكرێتەوە

ئاڤا نیوز

كتێبی مێژووی كورد لە ئەمریكا كە لە بەڵگەنامە ئەمریكییەكان و یاداشتی كوردانی دانیشتووی ئەو وڵاتە سەرچاوەی گرتووە، لەلایەن دامەزراوەی كوردستان كڕۆنیكل چاپ و بڵاوكرایەوە.

چیرۆكی سەرەكی: ڕۆژی یەكشەممە، دامەزراوەی كوردستان كڕۆنیكل، ڕێوڕەسمی ناساندن و بڵاوكردنەوەی كتێبی 'مێژووی كورد لە ئەمریكا 1907-2022 ' سازكرد، هەریەك لە بەرپرسی پەیوەندییەكانی دەرەوەی حكومەتی هەرێمی كوردستان و بەرپرسانی سیاسی و دیپلۆماتكاران و ڕۆشنبیران ئامادەی مەراسیمەكە بوون.

لێدوانی فەرمی: سەفین دزەیی، بەرپرسى پەیوەندییەکانى دەرەوەى حکومەتی هەرێمی كوردستان، ڕایگەیاند: دامەزراوەى کوردستان کڕۆنیکڵ خزمەتی زۆری لە بوارى میدیا و چاپەمەنى و ئەرشیف پێشکەش دەکات. هاوكات دەڵێت،'محەممەد قازى' کە نووسەری کتێبی مێژووی كورد لە ئەمریكایە،  بە هەوڵى بەردەوام و دواى ماندووبوونێکى زۆر، توانى بەم کتێبە مێژووییە نایابە، کتێبخانەى کوردى دەوڵەمەندتر بكات.

زانیاریی زیاتر: محەممەد قازى، نووسەری كتێبی مێژووی كورد لە ئەمریكا، باسى لە قۆناغەکانى نووسینى ئەو کتێبە و سوودوەرگرتن لە بەڵگەنامە ئەمریکییەکان و کوردانى دانیشتووى ئەو وڵاتە کرد کە بوونەتە هەوێنى لەدایکبوونى ئەم بەرهەمە مێژووییە. هاوكات بە واژۆی خۆى، کتێبەکەى پێشکەش بە ئامادەبووان کرد.