حیزبوڵڵا کوژرانی تەباتەبائی و ژمارەیەک لە هاوەڵەکانی لە هێرشێکی ئیسرائیل ڕادەگەیێنێت

ئاڤا نیوز

حیزبوڵڵای لوبنانی کوژرانی هەیسەم عەلی تەباتەبائی (سەید ئەبو عەلی) و سێ لە هاوەڵەکانی بەهۆی هێرشێکی گوماناویی ئیسرائیلەوە بۆ سەر ناوچەی حارەت حورەیک لە کەرتی باشووری بەیرووت ڕادەگەیێنێت.

چیرۆکی سەرەکی: ڕۆژی شەممە سوپای ئیسرائیل ڕایگەیاند، لە شاری بەیرووتی لوبنان فەرماندەیەکی باڵای حیزبوڵڵایان کردووەتە ئامانج بەناوی هەیسەم عەلی تەباتەبایی، کە سەرۆکی ئەرکانی هێزەکانی حیزبوڵڵا بووە.

ڕاگەیێنراوی فەرمی: بەگوێرەی ڕاگەیێنراوی حیزبوڵڵا "تەباتەبائی دوای ماوەیەکی درێژ لە چاوەڕوانیی گەیشتن بە خودا و دوای خزمەتێکی زۆر لە جیهاد و دڵسۆزی و خۆڕاگری لە ڕێگەی بەرگری و کاری بەردەوام لە دژی ئیسرائیل، پەیوەندی بە شەهیدانی دیکەوە کرد".

لە هەمان کاتدا: حیزبوڵڵا ئاماژە بەوە دەدات، تەباتەبائی هەرگیز ماندوو نەبووە لە ڕێگەی بەرگری لە خاک و گەلەکەی دا و ژیانی خۆی بەخت کردووە لە بەرگریدا.

ئەوەی پێویستە بیزانیت: پێشتر سەرکردەیەکی حیزبوڵڵا ڕایگەیاندبوو، حیزبەکە کار لەسەر دڵنیابوونەوە لە ناسنامەی کەسایەتییە ئامانجگیراوەکە دەکات و ڕاگەیاندنی فەرمی دوای تەواوبوونی لێکۆڵینەوە مەیدانییەکان دەبێت.

ئەمەش بزانە: هەیسەم عەلی تەباتەبائی ناسراو بە (سەید ئەبو عەلی)، سەرۆک ئەرکانی هێزەکانی حیزبوڵڵا و هاوکات کەسی دووەمی ئەو حیزبە بوو.