ئاڤای خەڵک؛ داوا لە پیشەوەرانی قەزای ڕزگاری دەکرێت دووکانەکانیان چۆڵ بکەن

ئاڤا نیوز

لە گەرمیان بەبێ قەرەبوو کردنەوە داوا لە پیشەوەرانی ناوچەی پیشەسازی قەزای ڕزگاری دەکرێت دووکانەکانیان چۆڵ بکرێت.

چیرۆکی سەرەکی: چەند مانگێک پێش ئێستا زەوی ناوچەی پیشەسازی ڕزگاری دراوە بە کۆمپانیایەک پڕۆژەیەکی نیشتەجێبوونی لەسەر دروست بکات، بۆ قەرەبووی دووکاندارەکانیش زەوییەکی دیکە دیاریکراوە کە بکرێت بە ناوچەی پیشەسازی، بەڵام تاوەکو ئێستا دووکانەکان دروست نەکراون و داواش لە پیشەوەران دەکرێت دووکانەکانیان چۆڵ بکەن.

زانیاریی بەدەستهاتوو: ڕەفعەت عەلی وەک نوێنەری پیشەوەرەکان بە ئاڤای وت، کۆمپانیاکە ئێستا لە بەڵێنەکەی پاشگەزبووەتەوە بۆیە ئێمەش ئامادەنین دووکانەکان چۆڵ بکەین.

لەلایەکی دیکەوە: کێشەیەکی دیکە دووکاندارە کرێچییەکانن، لە قەرەبووەکەدا هیچ حیسابێکیان بۆ نەکراوە. ئیدرس عوسمان بە نوێنەرایەتی ئەو دووکاندارانە بە ئاڤای وت، ئێمە 120 دووکاندارین، بژێویمان لەسەر ئەم کارەیە، ئەگەر بەبێ قەرەبوو ئێرە چۆڵ بکەین چی بکەین و لەکوێ کار بکەین.

لێدوانی فەرمی: ئاراس ئەحمەد، بەرێوەبەری شارەوانی ڕزگاری بە ئاڤای ڕاگەیاند، ئێمە وەک شارەوانی پشتگیری تەواوی داواکاری پیشەوەران دەکەین و ناهێڵین مافیان بخورێت.

لەبارەی کێشەی دووکاندارە کرێچییەکانیش دەڵێت، دڵنیایان دەکەمەوە ناهێڵم مافی ئەوانیش بفەوتێت، لیژنەیەکیش ڕادەسپێریم کاریان لەسەر بکات بۆ ئەوەی ئەوانیش دووکان وەربگرن.