هەفتەی داهاتوو پارەی گەنمی جووتیاران دابەش دەکرێت

ئاڤا نیوز

 

حکومەتی عێراق هەشتەمین قۆناغی پارەی گەنمی جووتیارانی بۆ هەرێمی کوردستان ڕەوانە کرد، ئەمڕۆ چەکی پارەکە لە لقی بانکی ناوەندی لە هەولێرەوە دەخرێتە سەر بانکەکانی هەرێمی کوردستان.

 

لێدوانە فەرمییەکان: نازم محەممەد، بەڕێوەبەری بازرگانی دانەوێڵەی دهۆک، بە ئاڤا نیوزی ڕاگەیاند: بڕی 158 ملیار و 454 ملیۆن دیناری پارەی گەنمی جووتیارانی هاتووە و لە لقی بانکی ناوەندییە لە هەولێر، چاوەڕوانین ڕەزامەندین بۆ ئەوەی چەکەک بدرێت و دەست بە دابەشکردنی بەسەر جووتیاران بکەین.

میران بەختیار، بەڕێوەبەری سایلۆی هەولێر، بە ئاڤا نیوزی گوت: چەکی پارەی گەنمی جووتیاران پاش 72 کاتژمێر داخلکردنی لە سیستم و گرتنەبەری ڕێکارە یاسایی و کارگێڕی و داراییەکان لە لقی بانکی ناوەندی لە هەولێر دەگوازرێتەوە بانکەکانی هەرێمی کوردستان، بۆیە لە ناوەڕاستی هەفتەی داهاتووەوە دەست بە دابەشکردنی پارەی گەنمی جوتیاران دەکەین.

 

 نەسرین ئەحمەد، بەڕێوەبەری سایلۆکانی سلێمانی، بە ئاڤا نیوزی گوت: ئەو پارەیەی هاتووە پشکی سلێمانی 60 ملیار دینارە، ئەمڕۆ چەکی پارەکەم بەدەست دەگات، بەڵام هەفتەیەکی پێویستە تاوەکو بۆ بەغدا بەگەڕێنرێتەوە و دواتر بۆمان بنێرنەوە، بۆیە دابەشکردنی پارەکە بەسەر جوتیاراندا پاش دوو هەفتەی دیکە دەبێت و دەکەوێتە سەرەتای مانگی 12.

زانیاریی زیاتر: ئەو  158 ملیار و 454 ملیۆن دیناری هاتووە، پشکی سلێمانی 60 ملیار دینار، هەولێر 55 ملیار و 454 ملیۆن دینار، دهۆک 43 ملیار دیناریان دەبێت.

ئەوەی پێویستە بیزانیت: ئەمە قۆناغی هەشتەمی پارەی گەنمی جووتیارانە کە بۆ هەرێمی کوردستان ڕەوانە دەکرێت، چاوەڕوان دەکرێت تاوەکو کۆتایی ئەمساڵ ئەو پارەیەی ماوە بەغدا هەمووی بنێرێت.

 

باکگراوند: بەغدا بۆ ئەمساڵی 700 هەزار تۆن گەنمی جووتیارانی هەرێمی کوردستانی وەرگرت.