لە عێراق ژنێكی بیانی لەسەر بازرگانیكردن بەماددەی هۆشبەر لەسێدارە دەدرێت

ئاڤا نیوز 

 

لە عێراق بەهۆی بازرگانیکردن بە ماددەی هۆشبەر سزای لە سێدارەدان بۆ سێ تاوانبار دەردەکرێت، لە نێویاندا ئافرەتێكی بیانییە.

 

وێنە گەورەكە: دوای ساغبوونەوەی تۆمەتی بازرگانیكردن بە ماددەی هۆشبەر، دادگای تاوانەكانی كەرخ لە شاری بەغدا، سزای لەسێدارەدانی بۆ سێ تاوانبار دەركرد، لە نێویاندا ئافرەتێكی خاوەن ڕەگەزنامەی بیانی هەیە.

 

ڕاگەیێنراوی فەرمی: بەگوێرەی ڕاگەیێنراوی ئەنجوومەنی باڵای دادوەریی عێراق كە وێنەیەكی دەست ئاڤا نیوز كەوتووە، سێ تۆمەتبار لەكاتی دەستگیركردنییان بڕی یەك كیلۆگرام ماددەی هۆشبەری جۆری "میتال ئەمڤیتامین" و دوو تەرازووی ئەلیكترۆنییان لەدەست گیراوە، ئەوەش سەلمێنەری ئەوەیە كە تۆمەتباران كڕین  فرۆشتنیان بە ماددەی هۆشبەر كردووە.

 

زانیاریی زیاتر: تۆمەتباران بەگوێرەی بڕگەكانی ماددەی (27-بڕگەی یەكەم) لە یاسای بەرەنگاربوونەوەی ماددە هۆشبەرەكان و كارتێكەرە عەقڵییەكان سزادراون.

شێوازی جێبەجێکردن: بەو پێیەی تاوانەكە بەهاوبەشی لەنێوان سێ تۆمەتبار ئەنجامدراوە، ڕەگەزی توندكردنی سزا حاڵەتی كەیسەكە دەگرێتەوە، بەمەش سزاكەیان لە زیندانی هەتاهەتایی توندتر كراوە بۆ سزای لەسێدارەدان.

ئەوەش بزانە: بەگوێرەی نوێترین ڕاپۆرتی ساڵانەی رێكخراوی لێبوردنی نێودەوڵەتی، دوای ئێران و سعوودیە، عێراق سێیەم وڵاتی ڕۆژهەڵاتی ناوەڕاستە لەڕووی زۆری ژمارەی جێبەجێكردنی سزاكانی لەسێدارەدان.