بەروبوومی گوێزی هەورامان کەمی کردووە

ئاڤا دیجیتاڵ

 

بەهۆی گۆڕانی کەشوهەوا و بڵاوبوونەوەی نەخۆشی لەنێو دار گوێزەکاندا، بەروبوومی گوێزی هەورامان بۆ زیاتر لە نیوەی بڕی پێشتری کەمی کردووە.

 

لە سەرەتای وەرزی پاییز و کاتی گوێزتەکاندنە، شەنیەرەکان بە دارەکەی دەستیانەوە بەسەر قەد و لقی دار گوێزەکاندا هەڵدەزنن، بۆ ئەوەی گوێزەکان بتەکێنن، بەڵام ئەمساڵ کەمی بەرهەم، شەنیەر و باخەوانەکانی نیگەران کردووە.

 

لە باخێکی حەوت دۆنمی، زیاتر لە 200 بنەدار گوێزی تێدایە، بەڵام بەروبوومی هەموویان تەنیا 15 هەزار گوێز بووە.

 

هاوبەش فایەق، شەنیەرێکە لە نێو دارگوێزەکانی هەورامان و دەڵێت: یەکێک لە هۆکارەکانی ئەم کەمبوونەوەیە بەهۆی وشکەساڵی ڕابردووەوە بووە، دواتریش بەفرێکی زۆر بەسەریاندا باری، وایکرد کە چەند بنەگوێزێک بەتەواوی لەناوبچن.

 

بەروبوومی ئەمساڵی دار گوێزەکان بۆ باخەوانەکان دڵخۆشکەر نییە، چونکە نەخۆشی و گۆڕانی کەشوهەوا ئەوەندە بەرهەمی گوێزی هەورامانی کەمکردووە لەگەڵ ساڵانی پێشتر بەراورد ناکرێت.

 

حامید غەفار یەکێکە لە باخەوانە دێرینەکان و دەڵێت: لەم باخەدا ساڵانە 100 هەزار بۆ 150 هەزار گوێزم هەبووە، بەڵام ئەمساڵ تەنیا 6 هەزار گوێزم کۆکردۆتەوە.