شاندێكی دیوانی چاودێری دارایی عێراق لە هەولێرن

ئاڤا نیوز

شاندێكی دیوانی چاودێری دارایی عێراق، بۆ وردبینیكردنی لە داهات و خەرجی هەرێمی كوردستان لە هەولێرن، بڕیارە بەیانیی یەكشەممە 25-2-2024، لەگەڵ دیوانی چاودێری دارایی هەرێم دەست بەكارەكانیان بكەن.

لێدوانی فەرمیی: شاندێكی دیوانی چاودێری دارایی بۆ وردبینیكردنی داهات و خەرجی گەیشتنە لە هەولێر و لە بەیانیەوە، لە وەزارەتی دارایی و سامانە سروشتییەكانی هەرێمی كوردستان دەست بە وردبینی دەكەن، ئەوەش بەپێی ڕێككەوتنی هەردوو حكومەتی هەرێمی كوردستان و عێراقە، بەتایبەت بۆ بودجەی ساڵی 2024. هونەر جەمال، گوتەبێژی وەزارەتی دارایی و ئابووری هەرێمی كوردستان وای بە ئاڤا نیوز گوت.

لەلایەكی دیكەوە: دارا سێكانیانی، ئەندامی ئەنجوومەنی نوێنەرانی عێراق بە ئاڤا نیوزی ڕاگەیاند: ئەگەر ڕێكارە كارگێڕییەكان تەواو بكرێن، تاوەكو هەفتەی داهاتوو پارەكەی هەرێمی كوردستان دەنێردرێت.

ئەوەی پێویستە بیزانیت: ئامانجی لە هاتنی شاندی دیوانی چاودێری دارایی عێراق، بۆ جێبەجێكردنی یاسای بودجەیە كە لەماددەی 12 هاتووە، بەمەبەستی وردبینیكردن لە داهات و خەرجی شەش مانگی كۆتایی ساڵی 2023.

باكگراوند:  لە 20-2-2024، محەممەد شیاع سوودانی، سەرۆكوەزیرانی عێراق، دوای كۆبوونەوەی ئەنجوومەنی وەزیران لە كۆنگرەیەكی ڕۆژنامەوانیدا ڕایگەیاند: تاوەكو هەمواری یاسای بودجەی ساڵی 2024 ناردنی پارە بۆ مووچەی مووچەخۆرانی هەرێمی كوردستان بەردەوام دەبێت.