لە کفری شوێنەوارێکی تەمەن دوو هەزار ساڵ دەشێوێنرێت

ئاڤا نیوز

 

بەڕێوەبەرایەتیی شوێنەوار و کەلەپووری کفری لە ڕاگەیێنراوێكدا ئاشكرای دەكات كە شوێنەوارێكی دەڤەرەكە كە تەمەنی دوو هەزار ساڵە لەلایەن چەند کەسێکەوە شێوێندراوە.

 

ڕاگەیێنراوی فەرمی: بەڕێوەبەرایەتیی شوێنەواری كفری ڕایگەیاند: لەلایەن کەسانی نەناسراوەوە شوێنەواری مێژوویی (قەرەئۆغڵان) لە کفری شێوێندراوە و ڕووبەرێکی زۆر لە شوێنەوارەکەیان کێڵاوە، ئەمە لە کاتێکدا ئەو شوێنەوارە ماوەی زیاتر لە ساڵێکە لەلایەن بەڕێوەبەرایەتیەکەمانەوە پەرژینی بۆ کراوە بۆ ئەوەی پارێزراو بێت، بەڵام ئەو دەستە تێکدەرانە دەرگای پەرژینەکەشیان تێکداوە.

 

لەلایەكی دیكەوە: بەڕێوەبەرایەتییەكە وێڕای ئیدانەكردنی كارەكە، ئەوەشی خستووەتە ڕوو كە بە ڕێکكاری یاسایی مامەڵە لەگەڵ ڕووداوەكە دەکات، جەختیش دەكاتەوە "لەم پێشێلکارییە بێدەنگ نابین کە بەرامبەر یەکێک لە شوێنەوارە دێرینەکانی کفری و شارستانیەتی کوردستان و سامانێکی نیشتمانی کراوە کە تەمەنی لە دوو هەزار ساڵ زیاترە."

 

ئەوەش بزانە: شوێنەواری كفری داواش لە ئیدارەی ناوچەکە و حکومەتی خۆجێی گەرمیان و کفری دەکات بە زووترین کات بێنە دەنگ.