ئاڤا ناسنامە و چیرۆکی دەستگیرکردنی ئەمیری ویلایەتی کوردستان لەنێو داعش ئاشکرا دەکات

ئاڤا نیوز

 

ئاڤا ناسنامەی ئازاد شاخانی، ئەمیری ویلایەتی کوردستان لەناو داعش و زانیاری لەبارەی حەوت داعشە دەستگیرکراوەکەی دیکە لە پارێزگای کەرکووک ئاشکرا دەکات، سەرجەمیان کوردن و خەڵکی کەرکووکن.

 

وێنە گەورەکە: دەزگای ئاسایشی نیشتمانیی عێراق، ئەمڕۆ شەممە پووچەڵکردنەوەی پلانێکی "تیرۆریستی مەترسیدار"ی داعشی لە کەرکووک ڕاگەیاند، لەگەڵ دەستگیرکردنی ئەمیرێکی کوردی داعش و حەوت چەکداری دیکەی ڕێکخراوەکە کە هەموویان کوردن.

چیرۆکی سەرەکی:  بەیانی ڕۆژی 11ی مانگی 9ی ئەمساڵ، لە گوندی سێکانییان کە دەکەوێتە باکووری شاری کەرکووک، ئۆپەراسیۆنێکی هاوبەش لە نێوان دەزگای ئاسایشی نیشتمانی عێراق و پۆلیسی کەرکووک و دەزگای بەرەنگاربوونەوەی تیرۆر لە سلێمانی کرا، ڕووبەڕووبوونەوە لە نێوان چەکدارێکی داعش و هێزە ئەمنییەکان دروست بوو، چەکدارەکەی داعش دوو ئەفسەر و کارمەندێکی هێزە ئەمنییەکانی بریندار کرد، دواتر کە گەمارۆدرا، خۆی کوشت و ئامادە نەبوو خۆی ڕادەست بکات.

 

زانیاریی تایبەت: ئاڤا زانیویەتی چەکدارەکەی داعش ناوی عەبدوڵڵا ئەحمەد بوو، بە ڕەگەز کوردە و لە دایکبووی ساڵی 1998ـە و لەنێو داعش بەرپرسیارێتی هەبووە.لە ئۆپەراسیۆنەکەدا کەسێکی دیکە کە زاوای عەبدوڵڵا بوو و تازە لە ئەمریکا گەڕابووەوە و دەستگیر کرا، بەڵام دوای ئەوەی دەرکەوتووە هیچ پەیوەندییەکی بە داعشەوە نییە، ئازاد کراوە.

 

هەنگاوی دواتر:  هەمان ئەو ڕۆژەی ئۆپەراسیۆنەکە کراوە، هێزە ئەمنییەکان چەند کەسێکی دیکەیان دەستگیر کردووە و دواتر ژمارەیان گەیشتووەتە هەشت کەس. ئاڤا لە پۆلیس و ئاسیشی کەرکووک زانیاری دەستکەوتووە کە دەستگیرکراوەکان کوردن  و دانیشتووی گەڕەکی ڕەحیماوای کەرکووکن، یەکێکیشیان بە ناوی ئازاد شاخانی ئەمیری ویلایەتی کوردستان بووە لەناو داعش، نازناوی یوسف بووە و لەدایکبووی ساڵی 1996ە. یەکێکی دیکەش لە دەستگیرکراوەکان ناوی (م. ک).

 

پلانیان چی بووە: ئەرشەد حاکم، گوتەبێژی دەزگای ئاسایشی نیشتمانیی عێراق لە لێدوانێکی ڕۆژنامەوانیدا ڕایگەیاند، ئۆپەراسیۆنەکەیان جۆری بووە و بە پشتبەستن بە زانیاری هەواڵگریی پێشوەخت و دروست ئەنجامیان داوە، چەکدارەکانی داعش مەبەستیان ئەوە بووە کە شوێنە حکومییەکان و کوشتنی کەسایەتییە ئەمنییەکان لە کەرکووک بکەنە ئامانج.

 

باکگراوند: لە ماوەکانی ڕابردوودا لە پارێزگای کەرکووک 50 ئەندامی داعش دەستگیرکراون و لە دادگا سزادراون، لەنێو سزاکاندا لەسێدارەدان و زیندانی هەتاهەتایی هەیە. هەر ئەم مانگەش والی عێراقی داعش و هەشت لە سەرکردە باڵاکانی ئەو ڕێکخراوە لە کەرکووک کوژران، ئاڤا زانیویەتی یەکێک لەوانە کورد بووە بە ناوی (ڕ.ع) خەڵکی هەڵەبجە بووە و لە حەمرین کوژراوە.