دادگای کارگێڕی عێراق فەرمانسالاریی بۆ هەڵپەساردنی بڕیارێکی سوودانی دەردەکات

ئاڤا نیوز

دادگای کارگێڕی عێراق بڕیارێکی سەرۆکوەزیرانی فیدراڵی بۆ دوورخستنەوەی ئەندامێکی ئەنجوومەنی ئەمیندارییەتی دەستەی ڕاگەیاندن و پەیوەندییەکان هەڵپەسارد، فەرمانسالارییەکەش تا یەکلاییکردنەوەی سکاڵای سەر بڕیارەکەی سوودانی کارا دەبێت.

چیرۆکی سەرەکی: 3ـی ئەم مانگە، هیشام رکابی، ئەندامی ئەنجوومەنی ئەمیندارییەتی دەستەی ڕاگەیاندن و پەیوەندییەکانی عێراق بە ئاڤا میدیای ڕاگەیاند، بەبڕیاری سەرۆکوەزیران لە پۆستی ئەندامی ئەنجوومەنی ئەمیندارییەتی دەستەی ڕاگەیاندن و پەیوەندییەکان دوورخراوەتەوە و باسم عەوادی وتەبێژی حکومەتی عێراق لە شوێنیی دانراوە، ئەوەش لەژێر کاریگەری دۆخی هەڵبژاردن بووە بەتایبەتیش کە ئەو لەگەڵ پۆستە حکومییەکەیدا، بەڕێوەبەری نووسینگەی نووری مالیکی، سەرۆکی هاوپەیمانی دەوڵەتی یاساشە.

نووسراوی فەرمی: دادگای کارگێڕی عێراق ئەمڕۆ چوارشەممە لەسەر سکاڵای هیشام رکابی، ئەندامی ئەنجوومەنی ئەمیندارییەتی دەستەی ڕاگەیاندن و پەیوەندییەکانی عێراق کۆبووەتەوە و بڕیاریداوە بڕیارەکەی 2ـی ئەم مانگەی محەممەد شیاع سوودانی، سەرۆکوەزیرانی عێراق بۆ دوورخستنەوەی ناوبراو لەو ئەنجوومەنە هەڵپەسێرێت.
 

دادگاکە دەڵێت، سکاڵاکە بنەمای دەرکردنی فەرمانسالاری هەبووە کە ڕێکارێکی کاتییە بۆ هەڵپەساردنی جێبەجێکردنی بڕیاری دوورخستنەوەی هیشام رکابی، فەرمانسالارییەکەش تا یەکلاییکردنەوەی سکاڵا و کۆتا بڕیاری دادگا لەسەر ئەم بابەتە بە کارایی دەمێنێتەوە.