بەدواداچوون بۆ گەندەڵیکردن لە دامەزراندنی وانەبێژان بە کوێ گەیشتووە؟

ئاڤا نیوز

لیژنەیەکی وەزارەتی خوێندنی باڵا بۆ بەدواداچوون لە دامەزراندنی وانەبێژان سەردانی زۆربەی زانکۆ و پەیمانگە حکومییەکانی کردووە و تەنیا ئەوانە دادەمەزرێن کە شایستەن.

وێنە گەورەکە: دوای تەقینەوەی کەیسی گەندەڵی زانکۆی ڕاپەڕین لە بابەتی دامەزراندنی وانەبێژان، وەزارەتی خوێندنی باڵا و توێژینەوەی زانستی لیژنەیەکی بەدواداچوونی پێکهێناوە و سەردانی زانکۆ و پەیمانگەکان دەکات،  وردبینی و بەدواداچوون بۆ لیستی ئەو وانەبێژانە دەکات کە بڕیاری بەگرێبەستکردن دەیانگرێتەوە، تەنها ئەو ئەو وانەبێژانە دادەمەزرێن کە لە چاوپێکەوتنی لیژنەکە سەرکەوتوو دەبن.

ئەوەی پێویستە بیزانیت: لیژنەکە ورد و قووڵە، داوای سەرجەم بەڵگەکان دەکات، وەکو فەرمانی زانکۆ کاتێک وەکو وانەبێژ دەستبەکار بووە، لیستی مووچەی مانگانە، خشتەی وانەوتنەوە و .. هیتد، بۆ ئەوەی دڵنیابن کێ بەفعلی وانەبێژ بووە.

زانیاریی زیاتر: چوار هەزار و 104 وانەبێژی زانکۆ و پەیمانگەکان  پرۆسەی بایۆمەتریان تەواوکردووە و لە قۆناغی کۆتایی مامەڵەی دامەزراندنن بە گرێبەست، لیژنەکەش تاوەکو ئێستا سەردانی زۆربەی زانکۆ و پەیمانگەکانی کردووە و تەنیا سێ زانکۆ ماون سەردانیان بکرێت.

لێدوانی فەرمی: د. توانا نەجەف، سەرۆکی دیوانی وەزارەتی خوێندنی باڵا و توێژینەوەی زانستی بە ئاڤا نیوزی گوت، "هەر وانەبێژێک پێشینەی کارکردنی نەبێت و زانیارییەکانی نادروست بن گرێبەستی بۆ ناکرێت."

زانیاریی تایبەت: بەگوێرەی بەدواداچوونی ئاڤا، ئەوانەی شایستەن لە مووچەی مانگی 11 وە مووچەیان بۆ دەبەسترێت، بەگوێرەی بڕوانامەکانیان مووچەیان لە 500 هەزار بۆ یەک ملیۆن و 250 هەزار دینار دەبێت.