دادگای فیدڕاڵی لەسەر سکاڵایەکی سوودانی دژی پەرلەمان کۆدەبێتەوە

ئاڤا نیوز

 

ئەمڕۆ دادگای فیدڕاڵی لەسەر سکاڵایەکی سەرۆکوەزیرانی عێراق کۆدەبێتەوە، کە دژی ماددەیەکی یاسای بودجە تۆماریکردووە، سکاڵاکە پەیوەستە بە دۆسیەی کۆتاییهێنان بە بەڕێوەبردنی دامەزراوەکانی دەوڵەت بەشێوەی وەکالەت.

 

وێنە گەورەکە: لە کاتی پەسەندکردنی یاسای بودجەی سێ ساڵدا، پەرلەمانتارانی عێراق دەنگیان لەسەر بڕگەیەکدا دواتر لە یاساکە جێگرکرا، بەگوێرەی ئەو بڕگەیەش دەبوو حکومەت تا 30\11\2023 کۆتایی بە دۆسیەی بەڕێوەبردنی دامەزراوەکانی دەوڵەت بەشێوەی وەکالەت بهێنێت.

 

ڕاگەیێنراوی فەرمی: بەگوێرەی خشتەی کۆبوونەوەکانی ئەمڕۆ دادگای فیدڕاڵی، ئەمڕۆ دادگاکە لەسەر سکاڵایەکی سەرۆکوەزیرانی عێراق کۆدەبێتەوە، کە دژی سەرۆکی پەرلەمان تۆماریکردووە و داوایکردووە ئەو بڕگەیەی یاسای بودجە بە نادەستووری دابنرێت.

 

لەلایەکی دیکەوە: کۆتایی ساڵی 2023، دادگای فیدڕاڵی فەرمانێکی سالاری لەسەر ئەو بابەتە دەرکرد، بەگوێرەی فەرمانەکەش بەڕێوەبردنی دامەزراوەکانی دەوڵەت بەشێوەی وەکالەت بەردەوام دەبێت تا دادگاکە کۆتا بڕیاری خۆی لەسەر سکاڵاکەی سەرۆکوەزیران دەردەکات.