ئاگربەستی نێوان ئیسرائیل و حیزبوڵڵای لوبنان كەوتە بواری جێبەجێكردن

ئاڤا نیوز

 

ئاگربەستی 60 ڕۆژی نێوان ئیسرائیل و حیزبوڵڵای لوبنان، لە کاتژمێر چواری بەرەبەیانی ئەمڕۆوە کەوتە بواری جێبەجێکردن.

 

چیرۆکی سەرەکی: لە دوای 23ی ئەیلوولی ئەمساڵەوە هاوکات لەگەڵ شەڕی غەززە، ئیسرائیل هێزەکانی حیزبوڵڵای لە لوبنان بە ئامانج گرت، ئەمەش دوا بە دوای ئەوەی ئەو گرووپە پشتیووانی لە حەماس کرد و لە خاکی لوبنانەوە بنکە و بارەگا سەربازییەکانی ئیسرائیلی بۆردومان کرد، دواتر بەهۆیەوە جەنگ و ماڵوێرانی ڕووی لە ناوچەکە کرد، دوای چەندین هەوڵی ناوخۆی و دەرەکیش دواجار ئاگر بەستێکی 60 ڕۆژی لەنێوان حیزبوڵڵای لوبنان و ئیسرائیل هاتە ئاراوە.

 

لێدوانی فەرمی: جۆبایدن، سەرۆکی ئەمریکا لە کۆشكی سپی جەختی لەم ئاگربەستە کردەوە و وتی "ئاگربەستەکە پێویستە هەمیشەیی بێت، دوژمنایەتی کۆتایی بێت و نابێت جارێکی دیکە حیزبوڵڵا هەڕەشە لە ئاسایشی ئیسرائیل بکات.

 

شێوازی جێبەجێکردن: رێککەوتنی ئاگربەستی نێوان حیزبوڵڵای لوبنان و ئیسرائیل بەم شێوازەیە:

 

-  حیزبوڵڵا و سەرجەم گرووپە چەکدارەکانی دیکە لە نێو خاکی لوبنانەوە هیچ هێرشێک ناکەنە سەر ئیسرائیل.

-  ئیسرائیل هیچ هێرشێک ناکاتە سەر لوبنان و هیچ پێگەیەکی بە ئامانج ناگرێت، لە رێگەی زەمینی یان ئاسمانی یان دەریایی بێت.

-  ئیسرائیل و لوبنان داندەنێن بە بڕیاری ژمارە 1701ـی ئەنجوومەنی ئاسایشی سەر بە نەتەوەیەکگرتووەکان.

بڕیارنامەی 1701 مەبەست لێی چارەسەرکردنی شەڕی لوبنان بوو لە ساڵی 2006دا.

-  ئەو پابەندییانەی لە ڕێککەوتنەکان ئاماژەی پێدراوە نابنە ڕێگر لەبەردەم ئیسرائیل و لوبنان بۆ بەرگری کردن لە خۆیان.

- هێزی ئاسایش و سوپای لوبنان دوو لایەنی چەکداری فەرمی ڕێگە پێدراو دەبن کە لە باشووری لوبنان چەک هەڵبگرن.

-  فرۆشتنی چەک و دابینکردن و بەرهەمهێنان و هەر پارچەیەکی دیکەی پەیوەست بە چەک دەبێت لەلایەن حکومەتی لوبنانەوە سەرپەرشتی بکرێت.

-  سەرجەم دامەزراوەکانی بەرهەمهێنانی چەک کە مۆڵەتی فەرمییان هەڵدەوەشێندرێنەوە.

-  سەرجەم ژێرخان و پێگە سەربازییەکان هەڵدەوەشێندرێنەوە و هەموو ئەو چەک و جبەخانانەی پێچەوانەی پابەندییەکانی رێککەوتنی ئاگربەستە دەستیان بەسەردا دەگیرێت.

-  لیژنەیەک بە ڕەزامەندی ئیسرائیل و لوبنان پێکدەهێندرێت، بۆ ئەوەی سەرپەرشت و هاوکاربێت لە جێبەجێکردنی رێککەوتنی ئاگربەست.

-  ئیسرائیل و لوبنان هەر پێشێلکارییەکی ئاگربەست بۆ لیژنەکەیان و بۆ هێزی کاتی نەتەوەیەکگرتووەکان (یونیفیل) بەرزدەکەنەوە.

- هێزی ئەمنی و سوپای فەرمی لوبنان بە درێژایی سنووری و لوبنان و خاڵە سنوورییەکان و خاڵە دیاریکراوکان لە باشووری وڵاتەکە بڵاوەیان پێ دەکرێت. 

-  ئیسرائیل هەنگاو بە هەنگاو لە هێڵی شین بۆ ماوەی 60 رۆژ لە باشووری لوبنان دەکشێتەوە. 

-  ئەمریکا بە شێوەی ناڕاستەوخۆ لەگەڵ ئیسرائیل و لوبنان دەست بە دانوستاندن دەکات، بۆ دیاریکردنی سنووری وشکانی باوەڕپێکراو لە نێوانیاندا.