کارێکی نایاسایی لە نەخۆشخانە تایبەتەکانی هەولێر ڕادەگیرێت

ئاڤا نیوز 

بەڕێوەبەرایەتیی تەندروستی هەولێر بڕیار دەدات لەمەودوا هیچ بڕە پارەیەک بە ناوی  پێدانی بەڵگەنامەی لەدایكبوون لە نەخۆشخانە تایبەتەکان لە هاووڵاتیان وەرنەگیرێت.

وێنە گەورەکە: نەخۆشخانە تایبەتەكان لە شاری هەولێر لە بەرامبەر پێدانی بەڵگەنامەی لەدایكبوون پارەیان لە هاووڵاتیان وەرگرتووە و بڕەکەی لە نێوان 20 بۆ 50 هەزار دینار بووە.

 

لێدوانی فەرمی: د. دلۆڤان محه‌ممه‌د، به‌ڕێوه‌به‌ری گشتیی ته‌ندروستیی هەولێر بە ئاڤا نیوزی ڕاگەیاند، وەرگرتنی ئەم بڕە پارەیە نایاسایی بووە، دوای ئەوەی پێیان زانیوە ڕاستەوخۆ ڕۆژی  12- 11- 2024 بە نووسراوی فەرمی سەرجەم نەخۆشخانەكانیان ئاگادار کردووەتەوە دەستبەجێ ڕایبگرن.

 

لەلایەکی دیکەوە: لیژنەی بەڕێوەبەرایەتیی تەندروستی هەولێر بەدواداچوون دەکات و هەر نەخۆشخانەیەک سەرپێچی بکات سزای دارایی دەدرێت.

ژمارەکان وادەڵێن: لە هەرێمی کوردستان 52 نەخۆشخانەی تایبەت و 83 نەخۆشخانەی گشتی هەیە، لەو ژمارەیە 38 نەخۆشخانەی گشتی و 18 نەخۆشخانەی تایبەت دەکەونە شاری هەولێر و سەرجەمیان لەژێر کۆنترۆڵی وەزارەتی تەندروستیدان.