داهاتی نانەوتی عێراق دەگاتە بەرزترین ئاستی بەراورد بە 21 ساڵی ڕابردوو

ئاڤا نیوز

 

بۆ یەکەمجار لە دوای ساڵی 2003ەوە داهاتی نانەوتی عێراق دەگاتە 12.3%ی کۆی داهاتی دەوڵەت، شارەزایانیش دەڵێن، زیادبوونی داهاتی نانەوتی لە چوارچێوەی چاکسازیی داراییدا هەنگاوێکی گرنگە.

 

وێنە گەورەکە: بەگوێرەی یاسای بودجە پێویستە حکومەت داهاتی نانەوتی عێراق بۆ 28 ترلیۆن دینار بەرزبکاتەوە، هەرچەندە تائێستا حکومەت 50%ـی ئەو ڕێژەیەی جێبەجێ کردووە، بەڵام وەک شارەزایان باسی دەکەن، ئەو هەنگاوەی حکومەت خاڵێکی ئەرێنییە لە چوارچێوەی پرۆسەی چاکسازیی داراییدا.

 

لێدوانی فەرمی: مەنار عوبەیدی، سەرۆکی دامەزراوەی عێراقی ئایندە بۆ لێکۆڵینەوەی ئابووری لە شیکارییەکدا بۆ بابەتی داهاتەکانی عێراق، ئەوەی خستووەتەڕوو، لە نۆ مانگی سەرەتای ئەمساڵدا داهاتی نانەوتی 198% گەشەی کردووە و گەیشتووەتە 14 ترلیۆن دینار لە کۆی داهاتی ئەو نۆ مانگەی وڵات کە 114 ترلیۆن دینار بووە، بەو پێیەش ئێستا داهاتی نانەوتی 12.3%ـی داهاتەکانی عێراق پێکدەهێنێت.

 

لەلایەکی دیکەوە: ئەو شارەزایە دەڵێت، زۆربەی زیادبوونی داهاتی نانەوتی لە باج و گومرگەوە سەرچاوەی گرتووە، پێشبینیش دەکات تا کۆتایی ئەمساڵ داهاتی نانەوتی بۆ 18 ترلیۆن دینار بەرزببێتەوە.