وەزیری پەروەردە: هەر قوتابی و مامۆستایەک زۆرترین کتێب بخوێنێتەوە خەڵات دەکرێت

ئاڤا نیوز

وەزارەتی پەروەردەی حکومەتی هەرێمی کوردستان، دوو خزمەتگوزاری دیجیتاڵی پەیوەست بە بەرزکردنەوەی ئاستی مامۆستایان و قوتابیان ڕاگەیاند.

وێنە گەورەکە: پڕۆژەکان پێکهاتوون لە پڕۆژەی E کتێبخانە و E ڕاهێنان، پڕۆژەی E ڕاهێنان بەهاوکاری ڕێکخراوی یونیسێف دروستکراوە، توانراوە پلاتفۆڕمێکی دیجیتاڵی بۆ ڕاهێنانی مامۆستایان دروست بکرێت، هەموو مامۆستایەک لە وەزارەتی پەروەردە کۆدی تایبەتی خۆی هەیە و ڕاهێنانی پێدەکرێت.

هەروەها پلاتفۆڕمی E کتێبخانە، پلاتفۆڕمێکی دیجیتاڵییە کتێبی تێدایە، مامۆستایان لەبواری پەروەردەیی، فێرکاری و زانستی، تەنانەت لە پسپۆڕی خۆشیاندا دەتوانن سوود وەرگرن لەو پلاتفۆڕمە، قوتابیان دەتوانن سوودمەند بن.

لێدوانی فەرمی: د. ئالان حەمە سەعید، وەزیری پەروەردەی حکومەتی هەرێمی کوردستان ڕایگەیاند: هەر مامۆستایەک زۆرترین کتێبی لەماوەی ساڵێکدا خوێندەوە، وەک مامۆستای خوێنەری ساڵ یەکەم، دووەم و سێیەم دیاریدەکرێت و وەزارەتی پەروەردە پاداشتی ماددی و مەعنەوی دەکات.

" هەر مامۆستایەک زۆرترین قوتابی هاندا بۆ خوێندنەوەی کتێب، وەک مامۆستای هاندەر مامەڵەی لەگەڵدا دەکرێت و خەڵاتی پێدەدرێت".

ئەمەش بزانە: ئۆفەری خەڵاتەکان قوتابیانیش دەگرێتەوە و هەر قوتابیەک زۆرترین کتێب لە ساڵێکدا بخوێنێتەوە، بەگوێرەی میکانزمێک لەلایەن کارگێڕی قوتابخانەکەیەوە خەڵات دەکرێت.