وەزیری ناوخۆی بەریتانیا بۆ مەسرور بارزانی: هەرێمی کوردستان پێگەیەکی بەهێزی هەیە

ئاڤا نیوز 

 

سەرۆکوەزیران مەسرور بارزانی پێشوازی لە وەزیری ناوخۆی بەریتانیا کرد و هەردوولا لەسەر گرنگی برەودان بە هەماهەنگی نێوانیان بۆ بەرەنگاربوونەوەی ماددەی هۆشبەر هاوڕابوون. هەر لە کۆبوونەوەکەدا وەزیری ناوخۆی بەریتانیا ئاماژەی بە بەهێزی پێگەی هەرێمی کوردستان کردووە. 

 

وێنە گەورەکە: سەرۆكوەزیران مەسرور بارزانی، پێشوازیی لە ئیڤێت کووپەر، وەزیری ناوخۆی بەریتانیا كرد و لە كۆبوونەوەیەكدا چەند پرسێكیان تاووتوێ كرد.

 

ڕاگەیێنراوی فەرمی: لە کۆبوونەوەدا پەرەپێدانی پەیوەندیی دوولایەنە و هەوڵەکانی ڕووبەڕووبوونەوەی کۆچکردنی نایاسایی تاوتوێ کرا، وەزیری ناوخۆی بەریتانیا، پیرۆزبایی سەرکەوتنی هەڵبژاردنی پەرلەمانی کوردستانی لە سەرۆکوەزیران مەسرور بارزانی کرد و بە هەڵبژاردنێکی سەرکەوتووی ناوبرد، هەروەها ئاماژەی بە پێگەی بەهێزی هەرێمی کوردستان دا، وەک هاوبەشێکی گرنگ و ستراتیژیی وڵاتەکەی لە ڕووبەڕووبوونەوەی تیرۆر و ئاڵنگارییە ئەمنییەکان.

 

گۆشەیەكی دیكە: سەرۆكوەزیران مەسرور بارزانی، سوپاس و پێزانینی هەرێمی کوردستانی بۆ پشتیوانی و هاریکاریی شانشینی یەکگرتوو دەربڕی و خواستی حکومەتی هەرێمی کوردستانی بۆ بەهێزترکردنی پەیوەندیی دوولایەنە لە هەموو بوارەکاندا لەسەر بنەمای بەرژەوەندیی هاوبەش دووپات کردەوە.

 

لەلایەكی دیكەوە: هەردوولا هاوڕابوون لەسەر گرنگیی برەودان بە هاریکاری و هەماهەنگیی هاوبەش بۆ بەرەنگاربوونەوەی کۆچی نایاسایی، تاوانی ڕێکخراو و بازرگانیکردن بە ماددەی هۆشبەر.

 

زانیاریی زیاتر: لە تەوەرێکی دیکەی کۆبوونەوەدا، بیروڕا لەبارەی چاکسازییەکانی حکومەتی هەرێمی کوردستان لە بوارەکانی بەدیجیتاڵکردنی خزمەتگوزارییە گشتییەکان و سیستەمی بانکی و بەتایبەتی پرۆژەی (هەژماری من) ئاڵوگۆڕ کرا.