وەزیری دارایی عێراق بۆ ناردنی مووچە بیانووی دیکە دەهێنێتەوە

ئاڤا نیوز

 

وەزیری دارایی عێراق پابەندی بڕیارەکەی دادگەی فیدراڵی عێراق نابێت و  بۆ ناردنی مووچەی فەرمانبەرانی هەرێمی کوردستان بیانووی نوێ دەهێنێتەوە.

 

زانیاریی تایبەت: ئاڤا نیوز زانیویەتی تەیف سامی، وەزیری دارایی عێراق ئامادەی جێبەجێکردنی بڕیارەکەی دادگەی باڵای فیدراڵیی عێراق نییە و بیانووی نوێ دەهێنێتەوە بۆ ناردنی مووچەی فەرمانبەرانی هەرێمی کوردستان.

 

نێوەڕۆکی بڕیارەکە: ڕۆژی 21ـی شوباتی 2024 دادگەی باڵای فیدراڵیی عێراق چەند بڕیارێکی لەبارەی مووچەی فەرمانبەران و شایستە داراییەکانی هەرێمی کوردستان دەرکرد:

- ده‌بێت حكومه‌تی عێراق مووچه‌ی فه‌رمانبه‌رانی هه‌رێمی کوردستان بدات و دابیننه‌كردنی پێشێلكارییه‌.

-ده‌بێت مافی فه‌رمانبه‌ران و خانه‌نشینانی هه‌رێمی كوردستان پارێزراو بێت و دەبێت سێ مووچەکەی ساڵی ڕابردوویان پێبدرێت.

-دەبێت حکومەتی عێراق بەبێ قەرز مووچە دابین بکات.

 

کاریگەری و لێکەوتەکان: جێبەجێنەکردنی بڕیاری دادگە، وادەکات کێشەی مووچە لەنێوان هەولێر و بەغدا بە چارەسەرنەکراوی بمێنێتەوە و مووچەی فەرمانبەران کە ئێستا لە دەستی حکومەتی عێراقە زیاتر دوابکەوێت و گوشاری ئابووری لەسەر فەرمانبەرانی هەرێمی کوردستان زیاتر بێت.

 

ئەمەش بزانە: یەکەمجار نییە وەزیری دارایی عێراق بۆ ناردنی مووچەی فەرمانبەران لەمپەر دروست بکات، پێشتریش تاوەکو گوژمە پارەیەکی واژۆ کردبێت، چەندین بیانووی هەبووە. هەموو جارێکیش حکومەتی هەرێمی کوردستان لەڕێی وەزارەتی دارایی و ئابوورییەوە وەڵامی داواکارییەکانی داوەتەوە و ڕایگەیاندووە "هەموو ئامارە داواکراوەکان بە ڕوونی لەبەردەست حکومەتی عێراقدان و هیچ بابەتێکی ناڕوون لە نووسراوەکانماندا نییە".