ساسان عەونی: پرۆسەی دابەشکردنی زەوی خێراتر دەکرێت

ئاڤا نیوز

 

وەزارەتی شارەوانی و گەشتوگوزار کار لەسەر خێراکردنی پرۆسەی دابەشکردنی زەوی و چارەسەرکردنی گرفتەکان دەکاتەوە، وەزیری شارەوانیش لەوبارەیەوە دەڵێت "ئەو گرفتانەی لە هەندێک شارەوانی هەن، دەبێت بە زوویی چارەسەر بکرێن و پرۆسەکە خێراتر بكرێت".

 

وێنە گەورەکە: لە ڕۆژی 16-10-2024، پرۆسەی دابەشکردنی زەوی لە هەرێمی کوردستان دەستیپێکرد، قۆناغی یەکەمی پرۆسەکەش لە ئیدارەی سەربەخۆی زاخۆ جێبەجێکرا.

 

لێدوانی فەرمی: ساسان عەونی، وەزیری شارەوانی و گەشتوگوزاری حکومەتی هەرێمی کوردستان، بە ئاڤا نیوزی ڕاگەیاند: ئەو گرفتانەی لە هەندێک شارەوانی هەیە پێویستە بە زوویی چارەسەر بکرێن و پرۆسەکە خێراتر بکرێت.

 

وەزیری شارەوانی و گەشتوگوزار، ئەوەشی گوت: سەرجەم ئەو فەرمانبەرانەی مەرجەکان دەیانگرێتەوە، دەبێت زەوی وەربگرن و لە بڕیارەکەی حکومەت سودمەند ببن.

 

ئەوەی پێویستە بیزانیت: دابەشکردنی زەوی بەسەر فەرمانبەراندا بە شێوەی تیروپشک دەبێت، بە کۆی گشتی 300 بۆ 350 هەزار فەرمانبەر و خانەنشین زەوییان پێدەدرێت، هەر فەرمانبەرێكیش 200 مەتر زەوی وەردەگرێت.

باکگراوند: دوای 18 ساڵ، لە ڕۆژی 27-3-2024، سەرۆکوەزیران مەسرور بارزانی لە کۆبوونەوەی ئەنجوومەنی وەزیران بڕیاری دابەشکردنی زەوی بەسەر فەرمانبەرانی دا.