چاککردنی ڕێگا و بانی هەولێر: ئاستەنگی زۆرینەی ڕێگاکانمان نەهێشتووە و دۆخەکە ئاساییە

ئاڤا نیوز

 

بەڕێوەبەرێتی چاککردن و پاراستنی ڕێگا و بانی هەولێر ئاماژە بەوەدەدات، کە تیمەکانیان سەرجەم ڕێگاکانیان پاککردووەتەوە، بەڵام لە هەندێ ڕێگا بەستەڵەک ماوە و دەبێت شوفێران بە وریاییەوە مامەڵە بکەن، وەکو ڕێگای سۆران – حاجی ئۆمەران.

 

چیرۆکی سەرەکی: شەپۆلی بەفربارین گەیشتە سەنتەری شارەکان، بەوهۆیەوە ئاستەنگی هاتوچۆ لە بەشێکی ڕێگا دەرەکییەکان دروستبوو، لە چەند کاتژمێری ڕابردوو ڕێگای هەولێر – شەقڵاوە، هەولێر – گۆمەسپان ژمارەیەک شوفێر بەهۆی سەختی ڕێگاوە گیریان خوارد.

 

هۆشداریی: بەڕێوەبەرێتی بەرگریی شارستانی هەولێر لە ڕێگەی ئاڤا میدیاوە داوا لە هاونیشتمانیان دەکات بۆ هیچ مەبەستێکی گەشیاریی یان هاتوچۆی ئاسایی، ڕێگەی سۆران حاجی ئۆمەران بەکار نەهێنن، بەمەبەستی سەلامەتی سەر و ماڵیان و لە چەند کاتژمێری داهاتوودا کاردەکەن بۆ کردنەوەی ڕێگاکە.

 

لێدوانی فەرمی: عیماد محەممەد ئەمین، بەڕێوەبەری چاککردن و پاراستنی ڕێگا و بانی هەولێر؛ بە ئاڤای گوت، "تیمەکانمان تاوەکو سێ و چواری بەرەبەیان سەرقاڵێ کردنەوەی ڕێگاکان بوون، ئێستا ئاستەنگی لەهیچ ڕێگایەک نەماوە دەتوانن بەکاری بهێنن، بەڵام دەبێت لە هەندێ ڕێگا وریای بەستەڵەک بن."

 

لەلایەکی دیکەوە: خوسرەت سادق، بەڕێوەبەری چاککردن و پاراستنی ڕێگا و بانی سۆران؛ بە ئاڤای ڕاگەیاند، "ڕێگای بێخاڵ کراوەتەوە، ڕێگا سەرەکییەکانی دیکەیش ئاستەنگیان نەماوە، بەڵام دەبێت گەشتیاران بە وریاییەوە مامەڵە لەگەڵ ڕێگای چۆمان – حاجی ئۆمەران بکەن، چونکە سەرەڕای ئەوەی تیمەکانمان بەبەردەوامی ڕێگا دەکەنەوە، بەڵام بەهۆی دابەزینی پلەکانی گەرما و بارینی کڕێوە بەردەوام بەفر کۆدەبێتەوە و ڕێگاکان دەبن بە بەستەڵەک."