بەریتانیا بۆ ڕێگریکردن لە کۆچکردن لەگەڵ هەرێمی کوردستان هاوئاهەنگی دەکات

ئاڤا نیوز

بەریتانیا لەگەڵ هەرێمی کوردستان و تورکیا و ڤێتنام هاوئاهەنگی دەکات بۆ کەمکردنەوەی کۆچی نایاسایی گەنجان، بۆ ئەم کارەش بودجەیەک بە قەبارەی 100 ملیۆن یۆرۆ تەرخان دەکات.

چیرۆکی سەرەکی: لە میانەی هەوڵەکانی حکومەتی بەریتانیا بۆ ڕووبەڕووبوونەوەی کۆچی نایاسایی، وەزیری ناوخۆی ئەو وڵاتە سەردانی هەرێمی کوردستانی کرد و لەگەڵ سەرۆکوەزیران مەسرور بارزانی و بەرپرسانی باڵای هەرێمی کوردستان ئەم پرسەی تاوتوێ کرد.

 

بابەتە ستراتیژییەکە: بەریتانیا دەیەوێت حکومەتی هەرێمی کوردستان لە ڕووبەرووبوونەوەی کۆچی نایساییدا هاوکاری بەریتانیا بێت و ڕێگە لە کۆچی نایاسایی بۆ ئەو وڵاتە بگرێت، بۆ ئەم مەبەستەش ئامادەیە پاڵپشتیی دارایی ئەم پڕۆژەیە بکات.

 

لەلایەکی دیکەوە: بەریتانیا هەمان پلانی لەگەڵ هەریەکە لە وڵاتانی تورکیا و ڤێتنام هەیە و بودجەیەکی 100 ملیۆن یۆرۆیی بۆ ئەم مەبەستە تەرخان کردووە. بەریتانیا دەیەوێت ئەو پارەیە بدات بەو وڵاتانە تا لە ڕێگەی ڕەخساندنی هەلی کارەوە ڕێگە لە کۆچی گەنجان بگرن. 

لێدوانی فەرمی: ئیڤێت کووپەر، وەزیری ناوخۆی بەریتانیا ڕایگەیاند: "شانازییەکی گەورەیە بۆ من کە لێرەم، لە هەرێمی کوردستان، وەک وەزیری ناوخۆ یەکەم سەردانی منە بۆ عێراق و بۆ وڵاتێکی دەرەوەی ئەوروپا، ئەمەش گرنگیی پەیوەندییەکانی بەریتانیا لەگەڵ عێراق و هەرێمی کوردستان نیشان دەدات".

 

ئیڤێت کووپەر بە ئاماژەکردن بەوەی وڵاتەکەی لەگەڵ کوردستان ساڵانێکی زۆرە پەیوەندیی هەیە، گوتی: "سەردانەکەی ئەمجارەش سەبارەت بە داهاتووی کاری هاوبەشمانە و حکومەتەکانمان لە ماوەی چەندین ساڵدا کاری زۆری هاوبەشیان پێکەوە ئەنجام داوە، بەتایبەت لە بواری ئاسایش و ڕووبەڕووبوونەوەی تیرۆر و زۆر ئاڵنگاریی دیکە کە ناوچەکە ڕووبەڕوویان بووەتەوە، هاوکات دەشمانەوێت لەم هاوئاهەنگییە لە داهاتوودا بەردەوام بین".