کۆبوونەوەی پەرلەمانی عێراق بۆ دەنگدان لەسەر پڕۆژەیاسا "گرنگ"ـەکان دواخرا

ئاڤا نیوز

 

کۆبوونەوەی پەرلەمانی عێراق بۆ دەنگدان لەسەر سێ پڕۆژەیاسای پەیوەست بە کورد، سوننە و شیعەکان دواخرا و بڕیارە سبەی دووشەممە دووبارە پەرلەمان کۆببێتەوە.

 

وێنە گەورەکە: پێشتر ئەو سێ پرۆژەیاسایە لە نێوان کورد و شیعە و سوننە جۆرێک لە ڕێککەوتنیان لەسەر کرا بوو و بڕیاربوو بە مەرج دەنگ بە پڕۆژەیاسای یەکتر بدەن، بەڵام ناکۆکییەکان لەبارەیانەوە هەر بەردەوام بوون.

 

ڕاگەیێنراوی فەرمی: فەرمانگەی ڕاگەیاندنی پەرلەمانی عێراق بڵاویکردەوە، دانیشتنی ئەمڕۆی پەرلەمانی عێراق بۆ سبەی دووشەممە دواخرا.

 

کارنامەی کۆبوونەوەی ئەمڕۆی پەرلەمان بریتیی بوو لە:

 

یەکەم: دەنگدان لەسەر پرۆژەیاسای هەمواری یاسای باری کەسی (شیعە داوای پەسەندکردنی دەکات).

 

دووەم: دەنگدان لەسەر پرۆژە یاسای گەڕاندنەوەی خاوەندارێتی موڵک و ماڵی داگیرکراو بە فەرمانی ئەنجوومەنی ناسراو بە "قیادەی سەورە"ــی هەڵوەشاوە (کورد داوای پەسەندکردنی دەکات).

 

سێیەم: هەموارکردنەوەی یاسای لێبووردنی گشتیی ژمارە 27ی ساڵی 2016ـە (سوننە داوای پەسەندکردنی دەکات).

 

چوارەم: خوێندنەوەی دووەم بۆ ڕەشنووسی یاسای فڕۆکەوانی مەدەنی.

 

پێنجەم:  خوێندنەوەی دووەم بۆ هەمواری یاسای شاری پیشەسازی.