شاندێک بۆ هاوتاکردنی مووچەی توێژێک سەردانی بەغدا دەکەن

 

ئاڤا نیوز

 

 

شاندێکی هەرێمی کوردستان بە سەرۆکایەتیی وەزیری کار و کاروباری کۆمەڵایەتی سەردانی بەغدا دەکەن و پرسی هاوتاکردنی مووچەی خاوەن پێداویستییە تایبەتەکان گرنگترین داواکاریی شاندەکەی هەرێمی کوردستانە.

 

وێنە گەورەکە: لە عێراق یاسای خاوەن پێداویستیی تایبەتی ژمارە 38ـی ساڵی  2013 هەموار کراوەتەوە و مووچەی خاوەن پێداویستییە تایبەتەکان لە 170 هەزار دینارەوە بۆ  250 هەزار دینار زیاد کراوە، بەڵام لە هەرێمی کوردستان مووچەیان 100 بۆ 150 هەزارە و تاوەکو ئێستا هاوتا نەکراوە.

 

لەلایەکی دیکەوە: 11 ساڵە بەستنی مووچە بۆ خاوەن پێداویستییە تایبەتەکانی هەرێمی کوردستان ڕاگیراوە لەو ماوەیەدا نزیکەی 30 هەزار خاوەن پێداویستی لە وەزارەتی کار و کاروباری کۆمەڵایەتی تۆمارکراون کە نزیکەی 14 هەزاریان لیژنەیان بۆ کراوە و چاوەڕێی بەستنی مووچەکانیان دەکەن.

 

لێدوانی فەرمی: یوسف چاوشین، بەڕێوەبەرى گشتیی چاودێری و گەشەپێدانی کۆمەڵایەتى هەولێر کە ئەندامی شاندەکەیە بە ئاڤا نیوزی ڕاگەیاند، "ئەمڕۆ سێشەممە شاندێکی باڵا بەسەرۆکایەتیی کوێستان محەممەد، وەزیری کار و کاروباری کۆمەڵایەتی؛ سەردانی بەغدا دەکەین لەگەڵ هاوتاکانمان لە عێراق و گفتوگۆ لەسەر چارەسەرکردنی چەند پرسێک دەکەین". 

 

ئەوەی پێویستە بیزانیت: لیستی تۆماری نوێی خاوەن پێداوسیتییە تایبەتەکان، کە ژمارەیان زیاتر لە 13 هەزار و 200 خاوەن پێداویستییە، هاوتاکردنی مووچەکانیان لەگەڵ ئەوانەی مووچەیان هەیە ژمارەیان دەبێتە 102 هەزار کەس. 

 

زانیاریی زیاتر: دەستپێکردنەوەی هاوکاریی چاودێریی کۆمەڵایەتی لە هەرێمی کوردستان و دابینکردنی دوو سەبەتەی خۆراکی ساڵانە بە خێزانە کەمدەرامەتەکان لەلایەن وەزارەتی کاری عێراق، دوو داواکاری دیکەی شاندەکەن.