ئەردۆغان و سوودانی: لەسەر یەکپارچەیی خاکی سووریا هاوڕاین

ئاڤا نیوز

 

سەرۆککۆماری تورکیا دڵنیایی دەداتە سەرۆکوەزیرانی عێراق کە کاری لە پێشینەی ئەوان پاراستنی سنووری وڵاتەکەیانە و هەموو ڕێوشوێنێکیش دەگرنەبەر بۆ ئەوەی پەکەکە نەتوانێت ڕووداوەکانی سوریا بقۆزێتەوە.

 

ڕاگەیێنراوی فەرمی: سەرۆکایەتیی کۆماری تورکیا ڕایگەیاند: "ڕەجەب تەیب ئەردۆغان، سەرۆککۆماری تورکیا لە پەیوەندییەکی تەلەفۆنیدا لەگەڵ محەممەد شیاع سوودانی، سەرۆکوەزیرانی عێراق ئەوەی بە سوودانی ڕاگەیاندووە کە کاری لە پێشینەی تورکیا پاراستنی ئارامی سنوورەکانییەتی."

 

زانیاریی زیاتر: بەگوێرەی ڕاگەیێنراوەکە لە پەیوەندییە تەلەفۆنییەکەدا سەرۆککۆماری تورکیا جەختی لەسەر گرنگی یەکپارچەیی سووریا کردووەتەوە و هەردوولا لەوبارەیەوە هاو هەڵوێست بوون.

 

لەهەمان کاتدا: ئەردۆغان ئەوەی ڕاگەیاندووە کە دیمەشق پێویستی بە پرۆسەیەکی سیاسی ڕاستەقینە هەیە نەک پەرەسەندنی دۆخی نەخوازراو.

 

لەلایەکی دیکە: لە پەیوەندییە تەلەفۆنییەکەدا ئەردۆغان سوودانی ئاگادارکردەوە کە وڵاتەکەی ڕێوشوێنی پێویست دەگرێتەبەر بۆ ئەوەی پارتی کرێکارانی کوردستان نەتوانێت ڕووداوەکانی سوریا بقۆزێتەوە.