زانیاریی نوێ لەبارەی شەڕی سووریا؛ دۆخەکە تۆزێک ئارام بووەتەوە

ئاڤا نیوز

 

هەسەدە دەستی بە هێرشکردن بۆ سەر سوپای بەشار ئەسەد کردووە، دەستەی تەحریر شامیش دەڵێت، نایانەوێت لەگەڵ هەسەدە و کورد شەڕ بکەن.

 

وێنە گەورەکە: نزیکەی هەفتەیەکە شەڕی دەستەی تەحریروشام و سوپای سووریا لە حەلەب و ئیدلب بەردەوامە و هەسەدەش لە دێرەزوور هێرشی کردووەتە سەر ژمارەیەک گوندی ژێر دەسەلاتی هێزە چەکدارەکانی نزیک لە ئێران و کۆنتڕۆڵی کردوون، ئەوەی ئەمڕۆ جیاوازبوو هاوپەیمانانیش لە هێرشەکەی هەسەدەدا بە فڕۆکە بۆردوومانی چەکدارەکانی کردووە.

 

زیانە سەرەکییەکان: بەپێی نوێترین ئامار کە ڕەوانگەی سووری بڵاویکردووەتەوە، تاوەکو ئێستا 571 کەس بەگشتی کوژراون، کە بەمشێوەیەیە: 237 کوژراو لە تەحریروشام، 54 کوژراو لە سوپای نیشتمانی، 182 کوژراو لە سوپا و گرووپە چەکدارەکانی نزیک لە ئێران و 92 هاووڵاتی سڤیل لەو ژمارەیەش 85 کەسیان بەهۆی هێرشی فڕۆکە جەنگییەکانەوە بووە.

 

لەلایەکی دیکە: لە بەشی باکووری حەلەب تا ڕادەیەک دۆخەکە ئارامی بەخۆیەوە بینیوە، ئەمەش دوای ڕێککەوتنی کشانەوەی هێزەکانی هەسەدە و یەپەگە لە ناوچە کوردییەکان و ئێستا پارێزگاکانی ئیدلب و حەلەب بە تەواوی لەدەستی تەحریروشامدایە، هاوکات تاوەکو ئێستا بەپێی ئامارەکانی نەتەوەیەکگرتووەکان زیاتر لە 500 هەزار کەس ئاوارە بوونە و بەشێکیان چوونەتەوە بۆ عەفرین و ئەوانەی دیکەش ڕوویان کردووەتە ناوچەکانی ژێر دەسەڵاتی هەسەدە.

 

زانیاریی زیاتر: ئەوەی پەیوەستە باشووری حەلەب و چوونی گرووپەکان بۆ حەما ئەوەیە، کە تاوەکو ئێستا بەرگری هێزەکانی ڕژێمی سووریا ڕێگەی نەداوە گرووپە چەکدارەکان بتوانن بچنە ناو شارەکەوە، بەڵام بە کەمتر لە 10 کیلۆمەتر لێی دوورن و ئەمڕۆش ژمارەیەک گوندیان لەو سنوورەیان کۆنترۆلکردووە.

 

ئەمەش بزانە: ئەوەی ئەمڕۆ جیاواز بوو هێرشی هەسەدەبوو بۆ سەر گرووپە چەکدارەکانی نزیک لە ئێران و ڕژێمی سووریا لە دێرەزوور و توانیویانە حەوت گوند کۆنتڕۆڵ بکەن و هێزەکانی هاوپەیمانانیش وەک پشتیوانی هەسەدە بۆردوومانی پێگەکەنای هێزەکانی حکومەت و گرووپە چەکدارەکانی نزیک لە ئێران کردووە.