147 کەس بە تۆمەتی ئەندامبوون لە پەکەکە لە تورکیا دەستگیرکران

ئاڤا نیوز

 

وەزارەتی ناوخۆی تورکیا ئۆپەراسیۆنێکی بۆ دەستبەسەرکردنی ئەندام و لایەنگرانی پەکەکە لە 30 پارێزگای تورکیا و باکووری کوردستان ڕێکخست و  147 گومانلێکراویان دەستگیرکرد.

 

چیرۆکی سەرەکی: لە ئۆپەراسیۆنی "گورز-28" کە لە شارە گەورەکانی ئیستەنبووڵ، دیاربەکر و ئەنتاڵیا و 27 پارێزگای دیکەی ڕێکخرابوو، 147 کەس بە گومانی ئەندامبوون و بەشداریکردنی لە چالاکییەکانی پەکەکە دەستبەسەرکران. 

 

ڕاگەیێنراوی فەرمی: عەلی یەرلیکایە، وەزیری ناوخۆی تورکیا لە ئێکس ڕایگەیاند: "ئەو کەسانەی ماوەی  40 ساڵە بۆسە بۆ تێکدانی برایەتیمان دادەنێن، یەکبوون و پێکەوەبوونی گەلەکەمان دەکەنە ئامانج، "گرووپە تیرۆرستییەکان" لە خاکی تورکیا هەڵدەکۆڵین و دەریان دەکەین، بەرەنگاربوونەوەی تیرۆر هێڵی سووری ئێمەیە".

 

زانیاریی زیاتر: بە گوێرەی زانیارییەکانی وەزارەتی ناوخۆ، دەستگیرکراوەکان تۆمەتبارن بە گواستنەوەی پارە بۆ پەکەکە، ڕێکخستنی چالاکییەکان، بڵاوکردنەوەی هەواڵ و پڕوپاگەندەکانی پەکەکە، هاندانی گەنجان بۆ ئەندام بوون لە پەکەکە. جگە لەوە چەکی بێ مۆڵەت و ماددەی هۆشدەر لە ماڵەکانیان دۆزراوەتەوە.