گۆڕانکاریی وەزاری لەکابینەکەی سوودانی ناکرێت

ئاڤا نیوز

 

لەدانیشتنە نهێنییەکەی پەرلەمانی عێراق سەرجەم فراکسیۆنەکان هاوڕابوون لەسەر ئەوەی هیچ گۆڕانکارییەکی وەزاری لەکابینەکەی سوودانی نەکرێت.

 

چیرۆکی سەرەکی: ڕۆژی 4-12-2024، پەرلەمانی عێراق بە ئامادەبوونی محەممەد شیاع سوودانی، سەرۆکوەزیرانی ئەو وڵاتە، دانیشتنێکی تایبەتی ڕێکخست، لە دانیشتنەکەدا سوودانی سیاسەتی حکومەتەکەی پەیوەست بە دۆخی عێراق، کابینەکەی، کێشەکانی بەغدا و هەولێر، ناوچەکە و ڕووبەڕووبوونەوەی ئاستەنگەکان تاوتوێ کرد.

 

لێدوانی فەرمی: عامر فایز، پەرلەمانتاری عێراق ڕایگەیاند: لە میانی دانیشتنە نهێنییەکەی پەرلەماندا، سەرۆکوەزیرانی عێراق جەختی لەوە کردەوە کە حکومەتی ئێستا، حکومەتێکی هاوپەیمانییە و هیچ گۆڕانکارییەکی وەزاری بەبێ ڕێککەوتنی پێشوەختەی لایەنە سیاسییەکان ناکرێت.

 

فایز ئاماژەی بەوەشکرد، زۆربەی فراکسیۆنەکان بیرۆکەی گۆڕانکاری وەزارییان لەم کاتەدا ڕەتکردووەتەوە، چونکە کەمی ماوەی حکومەتەکەی سوودانی ڕێگە بە گۆڕانکاری نادات.

 

ڕاگەیێنراوی فەرمی: پێشتر نووسینگەی سەرۆكوەزیرانی عێراق بڵاوی کردەوە، لیژنەیەكی تایبەت لەلایەن سوودانییەوە پێكهێنراوە بۆ هەڵسەنگاندنی كارەكانی كابینەكەی و بڕیاردراوە چوار بۆ پێنج وەزیر بگۆڕدرێن.