ئاوارەكانی لوبنان دەگەڕێنەوە وڵاتەکەیان

ئاڤا نیوز

 

دووەمین کاروانی گەڕانەوەی هاووڵاتییانی لوبنان بۆ وڵاتەکەیان دەستپێدەکات کە پێشتر ئاوارەی عێراق بوون بەهۆی هەڵگیرسانی شەڕەوە.

 

وێنە گەورەكە: بەهۆی هەڵگیرسانی شەڕی نێوان حیزبوڵڵای لوبنانی و سوپای ئیسرائیل، هەزاران لوبنانی ئاوارەی وڵاتانی ناوچەكە بوون لەنێویشیاندا عێراق، دوای ڕاگەیاندنی ئاگربەست، ئێستا ئاوارەكانی لوبنان دەگەڕێنەوە وڵاتەكەیان.

 

ڕاگەیێنراوی فەرمی: هێڵی ئاسمانی عێراقیە لەڕاگەیێنراوێكدا بڵاویكردووەتەوە، ئەمڕۆ هەینی 06-12-2024، دووەم گەشتی خۆبەخشانە بۆ گواستنەوەی ئاسمانی بۆ گەڕانەوەی ئاوارە نیشتەجێبووەكانی عێراق دەستپێدەكات كە 150 هاووڵاتیی لوبنانی لە فڕۆكەخانەی نێودەوڵەتیی بەغداوە بۆ فڕۆكەخانەی ڕەفیق حەریری لە بەیرووت دەگەڕێندرێنەوە.

 

زانیاریی زیاتر: هێڵی ئاسمانی عێراقیە ئاماژە بەوەشدەكات، گەڕاندنەوەی بەخۆڕایی ئاوارە لوبنانییەكان، لەسەر ڕاسپاردەی سەرۆکوەزیرانی عێراق، محەممەد شیاع سودانی و بەهەماهەنگی وەزارەتی گواستنەوە بووە بۆ ئەو لوبنانیانەی كە دەیانەوێت بە خواستی خۆیان بگەڕێنەوە وڵاتەکەیان.

 

لەلایەكی دیكەوە: دوو هەزار و 500 ئاوارەی دیكەی لوبنانی لەڕێگەی وشكانییەوە لە دەروازەی سنووریی قائیمەوە گەڕاونەتەوە لوبنان.