لە زێلکان بنکەی سەربازیی تورکیا بە مووشەک کرایە ئامانج

ئاڤا نیوز 

 

ئەمشەو بە چەند مووشەکێك هێرشکرایە سەر بنکەی سەربازیی تورکیا لە ناحیەی زێلکان.

 

لێدوانی فەرمی: محەممەد ئەمین، بەڕێوەبەری ناحیەی زێلکان بە ئاڤا نیوزی ڕاگەیاند: کاتژمێر نۆی ئەمشەو شەش مووشەک ئاڕاستەی بنکەی سەربازی زێلکان کراون و هیچ زیانێکی نەبووە. 

 

محەممەد ئەمین، باسی لەوەشکرد، شەش مووشەک ئاڕاستەی بنکەی سەربازی تورکیا لەو ناوچەیە کراوە، دوو لە مووشەکەکان لە نزیک گوندی 'گوداد' کەوتوونەتە خوارەوە، چوار مووشەکی دیکەش لە چیای باشیک کەوتوونەتە خوارەوە، ئاڕستەی مووشەکانیش لە نزیک شاری موسڵەوە بووە. 

 

زانیاریی زیاتر: نزیکە دوو ساڵ دەبێت هیچ هێرشکی مووشەکی نەکراوەتە سەر ئەو بنکە سەربازییەی تورکیا، کۆتا جار لە ساڵی 2022دا حەوت مووشەک ئاڕاستەی ئەو بنکەیە کراون و بەپێی زانیارییەکان، چوار لە مووشەکەكان لە نزیک بنکە سەربازییەكە كەوتوونەتە خوارەوە و مووشەكەكانی دیكەش، لە نزیک هەردوو گوندی جەربۆقە و هنجیرۆکە کەوتوونەتە خوارەوە.

 

ئەوەی پێویستە بزانیت: ئەم هێرشە مووشەکیە لە کاتێکدایە ڕەجەب تەیب ئەردۆغان، سەرۆککۆماری تورکیا دوای ئەنجامدانی نوێژی هەینی بە ڕۆژنامەنووسانی ڕاگەیاند، "ئەوان پێشتر دەستی هاوکارییان بۆ بەشار ئەسەد درێژ کرد و داوای چاوپێکەوتن و ئاساییکردنەوەی پەیوەندییەکانی نێوانیان کردووە، بەڵام ئەو وەڵامی ئەرێنی نەداونەتەوە"، هیوای بۆ هێزەکانی ئۆپۆزسیۆنی سووریا خواست لە پێشڕەوییەکانیان بەردەوابن.